< 返回
  • 【果然係姊妹劇】《深宮計》結局關鍵人物身份安排 同《宮心計》如出一轍
  •   26,607 views │ 2018年07月05日
    留言()

 

最後3集《深宮計》節奏快得交關,單係今、明兩晚播出嘅34、35兩集已經死咗2.5個人,仲交代埋劉心悠家姐死因,連陳煒欲拉馬浚偉落台嘅權鬥都失敗埋。難怪有人話若果《深宮計》刪去不必要嘅查案、感情戲、四司押韻吹水,其實幾集就會做完主線。
講返正題,點解有2.5個人死嘅?先係黃心穎傷重而死;繼而娜姐請胡定欣飲毒酒望同歸於盡失敗害死自己;最後蕭正楠假裝投誠陳煒反被殺,好彩死過翻生,計佢死咗0.5次。
至於劉心悠家姐殷瑈,原來殷瑈為得到出宮機會,協助韋后(米雪飾)送毒湯俾陳煒失敗,所以被煒哥凌虐致死。呢條伏線拖足成套劇,本來仲以為好大陣仗,點知交代如此簡單直接。

一向算無遺策嘅煒哥竟然臨尾香。由拉攏蕭正楠合作對付馬浚偉,到蕭正楠真係投誠後,煒哥又另生一計,決定手刃嫡出龍裔,致蕭正楠死地再嫁禍馬浚偉。好彩馬仔早有預謀,命蕭正楠假意投誠煒哥,亦知道煒哥會對蕭正楠狠下殺手,所以將計就計安排假死情節,然後當煒哥喺文武百官面前抬出棺木指控馬仔殺龍裔時,蕭正楠就大模斯樣現身令煒哥目瞪口呆。但重點係,點解殺蕭正楠唔死、棺木入面無蕭正楠條屍,煒哥都懵然不知嘅?關鍵就在於太平公主嘅家令──李美慧身上,因為佢其實係馬仔嘅內應,由刺殺蕭正楠、探鼻息判斷生死,到裝屍入棺,都係李美慧負責,煒哥對「親信」完全信賴,最後咪慘敗收場囉。

其實呢種被近身侍婢出賣嘅情節安排,姊妹劇《宮心計》已經係咁做,劇中佘詩曼、楊怡鬥餐死,後者更作惡多端,所以去到最後關頭,楊怡嘅近身侍婢陳自瑤見勢色唔對,於是變節出賣楊怡求自保。兩劇都係梅小青監製,用同一種方法完成兩套劇嘅結局,三個字:快、靚、正!
娜姐請胡定欣飲毒酒望同歸於盡。
最後失敗害死自己。
李美慧假意刺殺蕭正楠。
蕭正楠扮死。
陳煒帶上大殿嘅棺木入面無屍。
陳煒當堂嚇一跳。
最後先知被李美慧出賣。
熱門新聞
  • 【新抱紛紛反奶奶】晾條底褲奶奶都好多不滿 新抱阿Ann:忍唔到要爆啦(足本版) 88,318 views
  • 【公屋仔70萬豪裝居屋】394呎變成4房 有書房仲有衣帽間(足本版) 84,037 views
  • 【港女最驚係呢種】男人話請去旅行 港女唔肯驚人呃蝦條(足本版) 60,413 views
  • 【男友想夾硬】唔俾就威脅分手 港女唔識拒絕:但我唔想咁快囉(足本版) 57,692 views
  • 【陶傑點醒港女】想嫁有錢有樓靚仔 港女比白雪公主更虛幻(足本版) 39,692 views
  • 【陶傑點醒港女】住公屋港仔揀唔揀得過? 陶傑:要有呢幾樣配套......(足本版) 39,246 views