< 返回
  • 【放蛇斷正】無真空包裝無食用日期 供應商:係家農要求咁做
  •   38,162 views │ 2017年08月03日
    留言()

 

根據家農雞的包裝,記者找到訪裕豐食品(香港)有限公司,工廠位於荃灣。記者以零售商身份,指希望了解雞隻價錢及詳情。迎門的是裕豐老闆李淦基的姐姐,她即席打開單位內雪房,拿出兩隻已雪至結冰的熟雞向記者展示。「我哋平時交比超市嘅熟雞,就會係而加咁得透明袋包裝,但如果你係零售的話,我哋可以按你要求加靚仔啲嘅包裝。」

她指交給酒樓或食店的貨多數只用透明袋,因他們會即日處理及加工煮成不同菜式出售;而零售商多會要求裕豐加以具詳細資料的包裝。李小姐一邊講解,一邊把雞隻上磅,每隻也有超過兩斤重,跟家農出售的體積相近。

「批發嘅價大約係四十至五十蚊一隻。」這比家農現正出售的價錢貴約十元!李小姐強調此價是一向的批發價。「佢(簡利珍)呢個價位賣,一定蝕,但嗰個人做生意嘅手法唔同。」有員工指簡利珍曾親口承認每日都蝕緊,「但佢要先打開呢條路,打開後可能慢慢加價上去都唔奇。」

相關連結:
【做到揸瑪莎拉蒂】再揭平價菜檔家農 陰招狂售「唔生唔熟」雞
http://bit.ly/2f05oo1

【意外一幕●支吾以對】已有「豬肉王」契爺 菜檔天后赤腳現「火鍋哥」屋企
http://bit.ly/2tVNPw6

李小姐指與簡利珍的合作,是由長駐內地的弟弟李淦基負責,雞隻會直接從內地運去家農分店,不會經過香港工廠。「八成熟係客要求唔要咁熟,我就做到無咁熟。」她指八成熟雞的好處就是肉質較滑。「八成熟如果係短時間內賣就得,例如日日清個種,但如果去貨唔夠快要放一段時間,雪櫃又唔夠凍嘅話,就可能會有血水走出嚟。」她更指一般大公司或零售商,也會要求有食用日期,但是簡利珍卻非此貫做法。「係佢要求(唔打)嘅,咁佢唔打起碼唔洗下下睇日期做人,過左期就賣唔到。」

根據《食物及藥物(成分組合及標籤)規例》(第132W章) (《規例》)的規定,除非獲得豁免,符合《規例》預先包裝食物定義的食物,須加上適當保質期的可閱標記或標籤,如「此日期前最佳」(best before) 或「此日期或之前食用」(use by)的日期。食環署回覆指,家農所出售之熟雞並不屬規例附表4所載可獲豁免的項目,並指若有店鋪違規出售,最高可被判罰款五萬元及監禁六個月。

而對比超級市場售賣的同類熟雞,均有先進行真空包裝,家農卻缺少此重要步驟,香港冰鮮禽畜業商會主席郭時興透露此做法不常見。「在店鋪賣嘅大多數係真空包裝,因未知幾時賣出;交比食店嘅先無,因為佢快處理。」香港專業教育學院應用科學系講師方麗影博士指,以非真空包裝方式存放未全熟之肉類,確實有風險。「因部分煮熟,係有兩成未煮熟,高溫至包裝過程當中一定有個溫度下降,如果處理得唔太衛生,例如搵牛角扇吹涼雞隻,都係可能會交叉污染。」

她指雞隻在部分煮熟部分未煮熟下缺乏真空包裝,這樣的儲存是不太理想。「放喺四度或以下,都可能頂到一陣,但如果放喺二十多度、潮潮濕濕、溫溫熱熱嘅天氣,三、四日就有機會臭。」她提醒,如打開包裝後發現雞隻骨腔內有異味或腐味,則明顯不能食用。

撰文:財經組
攝錄:財經組

相關重溫:
【動畫●平價菜激戰】「豬霸王」建華集團力捧 80後菜檔小天后神速上位
http://bit.ly/2p7dc88

【動畫●揸瑪莎拉蒂】狂開42家平價菜檔家農 菜檔小天后:有契爺支持我
http://bit.ly/2puYZkz

【家農愈開愈多】點賣到10蚊3斤菜?直銷菜與批發菜大有分別
http://bit.ly/2oYWTxo

【街市霸權加劇】荃灣一個街口霸11鋪位 建華全港持500檔賣豬牛魚雞
http://bit.ly/2o64ea0
熱門新聞
  • 何雁詩強迫棄養 鄭俊弘用倒鈎鐵鏈綁狗 223,742 views
  • 鄭俊弘把口話狗仔好乖 為氹女友將愛犬送走 40,054 views
  • 瘦身梁頌昕行性感 晒迷人pink bra 39,961 views
  • 鄭俊弘被雪零收入身材暴漲 買嘢搵何雁詩埋單 34,421 views
  • 捕獲昔日新聞之花! 43歲黃德如依然省鏡 30,665 views
  • 王浩信視帝寶座危危乎 踩單車洩憤 30,217 views