< 返回
  • 【第壹盤生意】插花變賣婚紗 女強人:一人獨撐27年
  •   17,533 views │ 2017年09月28日
    留言()

 

1990年9月21日,第二十八期《壹週刊》,財經「原富篇」中首次刊載了「壹盤生意」,期間「壹盤生意」記載着各行各業的老闆們於金融風暴、沙士等逆境期間如何爭扎求存,隨後經濟復甦突圍而出百倍擴張。回顧當時首次受訪的《第壹盤生意》,是位花店老闆,多年前已經轉營婚紗生意,自言性格孤僻不懂與人相處,多次因此與拍檔鬩牆分手收場。現時一人獨撐生意,原來她已無心戀戰,打算把生意變賣給朋友,回內地過半退休生活。

第一盤的生意,是於屯門區的情軒花廊,當年這間鋪的的開業成本,包括鋪租連按金、花材、裝修等雜費,不過是大約三萬元。老闆陳麗玲說當年只要能插得一盤靚花看門口,自然生意滾滾來,與香港繁榮的經濟一樣:「當年普通插一盤花我都收一千,朋友開張要再靚啲我收二千添,老實講當時生意好好做,我收個學生教插花每個月都收佢八千蚊!」

主角陳小姐已經快「登六」,不再經營花店,她目前在旺角銀城廣場做婚紗直銷,「我好專業,真係好專業,有某個名人二代結婚,着個件婚紗起碼幾十萬,同我之前設計嘅,相差無幾。」

「香港都無邊幾個識做婚紗,啲新娘着件婚紗出嚟,個胸圓嘅扁嘅,都唔挺,你條腰要收入去,唔可以一直線咁,個胸墊都會影響,平胸墊會頂到個胸變平。」她多次強調自己很專業,何解要屈在銀城廣場的樓上鋪,平賣百多元一件的婚紗呢?她解釋自己怕人,加上不懂與人溝通,所以主力做設計,每年才開一次直銷,「上年東張西望嚟訪問,條龍排到樓下,我已經好驚,一開門啲人湧入去,我話唔賣啦!唔賣啦!」陳小姐把手伸得筆直,用力搖着,重演她當時激動的情緒。「所以我後來搵咗朋友幫手,我坐埋一邊叫啲新娘自己揀,又限每日只做三十個客。」

但以往的陳小姐似乎交遊廣闊,並非眼前這個會因太多客人湧至而崩潰的人。大概九三年,她結束了經營五年的花店,「個時大陸岩岩開放,我識好多台灣廠家,開始幫大陸人運原料入大陸,又有幫佢哋設計婚紗,送埋落香港做批發,太多時間唔係香港,所以無再做花店。」那時她開始批發婚嫁服飾,每天送貨去專賣婚嫁用品的太子金都商場,不過有個內地新移民婦女很快以低價搶佔這個市場,加上97年金融風暴,批發往金都的生意大減,她便直接以平價直銷搶生意,「我幫大陸廠做設計,我設計婚紗好快,一個月可以設計到五十件。佢地就免費送啲婚紗俾我,所以可以做到百幾蚊一件囉,我都無成本。」

現時店內除了零成本的一百八十元婚紗,還有價錢高一點,三百八十、六百八十的婚紗,是由與她相熟的台灣結婚百貨公司力源取來,「台灣力源嘅郭總當年佢喺大陸遇過麻煩,得我雪中送炭。所以依家我同佢攞衫,佢話你賣咗先俾錢啦,買唔去唔洗俾,我賣平咗佢哋都會收返平我。」店內有一件Demetrios的婚紗作為鎮店之寶,「任總當年喺清華大學畢業,落嚟香港,我鼓勵佢去打外國市場,經常幫佢安排飯局識人,仲搵方法塞錢俾佢,好似話五百蚊俾你爸爸買糖啦。」後來他成為Demetrios高層,令陳小姐可以「碌人情牌」,以低價買入小量Demetrios婚紗。

這段轉做零售的時間,令原已不懂與人溝通的她更拒絕與人接觸。她當時需要找拍檔合作,可惜每次都分手收場。「有個女人賣咸碟嘅,我覺得一個女人咁好可憐,就叫佢不如同我合作。租咗北角馬寶道一號二樓全層做,生意上咗軌道之後,有一次我上廣州攞貨,返到嚟全間鋪清空咗,佢搬咗去城市花園做。我不停鬧個看更,佢話陳小姐,佢都係老闆,我阻唔到佢搬貨呀。個次損失好似二十幾萬,啲貨我未俾錢,我打俾廠家朋友時我不停喊,都好彩有啲朋友話拎咗嘅衫唔駛俾錢。」

之後到佐敦偉晴街東山再起,這次不是拍檔出問題,亦是與拍檔的侄女有磨擦,她一氣之下便退出,「靚妹唔識,做唔成生意,但我好專業,啲客嚟到我話咁着,咁襯咪得囉,個陣半個月都做幾十萬生意,做得算幾大。我同佢講做唔成生意應該檢討自己,唔係話啲客。佢之後我親耳聽住佢同佢舅父講,我哋都做到生意啦,駛乜阿陳小姐喎!」自此之後,她沒有再找拍檔合作,一年只做一次直銷,其餘時間專心設計。去年更開始於內地生活,「上年直銷有個淡水女仔,邀請我返去,我返淡水睇過環境、氣氛覺得都可以,就返過去,我依家都成日係淡水。」她自言不會討好人,所以至今也是孤身一人,「人哋都有姨媽姑姐,我唔想累咗對方要全世界都唔要。」她已經打算結束香港這邊的生意,回內地淡水繼續設計婚紗、鑽飾,過半退休生活。

撰文:孫樂祈
攝錄:梁正平
熱門新聞
  • 【開心速遞隻鬼冇咗】不甘俾大台玩 顧紀筠兒子冇癮解約 57,263 views
  • 重提李思捷委屈爆喊 春卷:捧到佢上天,最後忘記咗你 53,609 views
  • 【3日2夜】羅敏莊帶團泰國睇樓 捧60萬豪裝物業 44,355 views
  • 【雜食王】李思捷四年偷食三件 春卷死忍 41,113 views
  • 【大台性女】 馮盈盈當街吸啜咀男友面珠登 40,052 views
  • 懷孕甘比面容飽滿 拖實精神大劉出席酒會 37,175 views