< 返回
  • 【封面●放蛇踢爆四部曲●一】3萬人網上「直銷」神奇噴霧 下線接貨送「十倍股」新招
  •   122,136 views │ 2018年01月03日
    留言()

 

2018年依始,恆指由「股王」騰訊帶動攀上三萬點,多少過去一年無買股而飲恨的人,蠢蠢欲動。貪念,可以帶人進入失去理智的深淵。

幾個月前開始,一隻護膚噴霧Maione在網上廣傳,公司聲稱將會美國上市,現在可率先買入「十倍原始股」,兩蚊能夠升到三十蚊!記者放蛇直擊,職員說老闆想大家「有錢齊齊搵」,不過要買入原始股,先要買入Maione神奇噴霧。

這支噴霧打着直銷旗號在網上兜售,聲稱美國製,功效勁過神仙水,除了去斑、除皺、去印,噴一噴更能瘦面、挺胸、及生髮。本刊諮詢過皮膚科醫生,他坦言有些成份聞所未聞。而其「直銷」手法,強調「拉人頭」收取被動收入,更建議新人「自己開戶做自己下線」,開得多、賺得多,令一班代理為了搵更多錢,陷入瘋狂狀態。

這支Maione噴霧幾個月來紅爆討論區,不時有人開帖詢問功效,既上過無綫電視節目《姐妹淘》,亦有Maione的會員將藝人詹瑞文在車上以此產品化妝的片段剪輯,放在youtube宣傳。片中詹瑞文上妝前噴了數下Maione,馬上感覺面部緊緻提升。網台主持黎則奮「Q仔」,更成為講師,多次開招商會推薦產品,又facebook發帖說今個星期賺了多少。

網上亦瘋傳一條短片,一位打扮花俏的婦人,在街邊買魚蛋時,不忘向老板推銷噴霧,說為他帶來了大量額外收入。婦人被網民鬧爆:「踩住人地屍體搵錢,真係可恥到無倫 永遠搵下一個替死鬼。」

記者在facebook檢閱,發現不少對產品「痴迷」的網友正在推銷,而最特別的,是先以「股票」招徠:「有無人想夾錢買原始股?美金兩蚊,上市預計10蚊,at list (least)5倍,發展有機會30蚊!」記者相約對方見面,原來是一名廿多歲少女。她一坐下便猛sell這隻「十倍股」,「呢間公司一八年下半年,會係美國纳斯達克上市。依家買原始股一股兩蚊美金,核數師見到公司條數,都嚇一跳,話做咩咁平賣?。公司喺美國、香港、台灣、新加坡、泰國、日本都有業務,依家只係用香港條數上市,上市後就會集合其他國家條數入去。計過可以升到廿蚊,老闆希望升到上三十蚊。」

不過,要買靚股,先要買靚貨,就是這枝神奇嘖霧:「無咁着數俾你就咁買原始股。我直接講,你要先買貨,你預件貨唔係cheap嘢。我哋公司叫億嘉國際,做直銷,唔係傳銷,公司有三萬人做緊。你買四萬蚊貨,即是三十支噴噴(噴霧),就可以平價買五百股。而且買貨有佣分,等於免費送股俾你!」

不過,少女對上市細節不甚了解,例如纳斯達克上市需三百名股東、公眾持股的市場總值要五百萬美金、總市值需五千萬美金等等,她唯一清楚的是:「公司頭三個月,就做夠上市要求條數!」她說老闆希望人人有錢賺,「生意人是要令錢變多,總之谷大條數,老板的出發點是一齊賺到錢!」

相關連結:

【封面●放蛇踢爆四部曲●二】稱全家共賺4千萬勁過騰訊 神奇產品代理:啲錢真係湧過嚟!
http://bit.ly/2C98lJJ

【封面●放蛇踢爆四部曲●三】一枝噴霧能瘦面生髮兼挺胸?醫生咁樣講...
http://bit.ly/2EzZ52C

【封面●放蛇踢爆四部曲●四】揭神奇噴霧幕後主腦 稱「美國製」但大陸設廠
http://bit.ly/2q7C2sW
熱門新聞
  • 化身YouTuber? 謝文欣拍片唱爆黃凱芹 72,595 views
  • 【啜爆陳茵媺】老婆一拖三返加 陳豪難離難捨機場抱緊些 (足本版) 71,978 views
  • 【煉成絕世好老公】陳豪為仔女月花10 萬租南灣 陳茵媺:咁都比較吃力! (足本版) 44,552 views
  • 【最佳女友自己埋單】李佳芯拍拖買金飾 準備俾錢男友陳炳銓即閃(足本版) 35,434 views
  • 【經典●五角苦戀搞到正印自殺】林青霞做雙重小三Out走蕭芳芳亦傳尋死 遭毒咒唔敢嫁秦漢(足本版) 33,457 views
  • 【天價公屋放租】懲教職員萬六蚊呎掃天價公屋 再叫租1萬回報有5厘(足本版) 27,516 views