< 返回
  • 你full pay 嗎?|吳宛盈
  •   4,248 views │ 2018年08月07日
    留言()

 

早排有位豪門女婿勸勉後生仔女要專注工作,等事業有成或者可以意想不到地full pay上車,雖然一番苦口婆心,但當然係畀做極連首期都儲唔夠嘅後生仔女鬧到暈喇,今次我唔打算研究佢有幾離地,而係想探討吓full pay 得起係咪會full pay?

如果無陳生咁好彩有父幹,再娶埋豪門千金有埋外父幹,單純靠自己努力打拼、咁犀利有能力full pay上車嘅後生仔女,斷估都相當叻仔叻女,唔係「人頭豬」級別。假設佢睇中嘅上車盤500萬,連埋佣金、厘印、律師費、裝修等等,估計埋單550萬左右,一炮過找數好處當然係唔洗供樓,但手上無晒流動資金,諗吓都覺得好無安全感。

雖然加息就快殺到埋身,但暫時仍然處於低息環境,按揭息率仲喺2.15厘水平,加上上車客買600萬樓下上車盤,仲做到80%按揭,以頭先嘅上車個案,首期連雜費150萬,借400萬連按揭保費供30年,月供大約 $15,500。業主除咗有幾萬蚊銀行現金回贈,仲有400萬喺自己袋,買吓匯豐收4、5厘利息,分分鐘夠冚供樓條數,保守啲擺一半做Mortgage拎一半投資,有需要現金周轉唔洗求人,彈性點都好過full pay,就算真係瘋狂加息,到時再部署還錢贖樓都唔遲。

試問除咗物業按揭,世界上仲邊有咩投資品可以超長期高槓桿,畀你借幾百萬+兩厘幾息+分三十年還?所以陳生提到嘅事業有成full pay 後生仔,應該都識計呢條數。當然啦!世界上一定有肯full pay買樓嘅人,例如唔計婆乸數嘅富豪、買樓送畀人嘅人、副身家隨時被查封嘅人、有大把錢但無入息證明嘅人,um 或者係爸爸、外父畀錢買樓,咁就老虎蟹都叫佢full pay 啦!係咪先?

專欄作者簡介:

吳宛盈Carol

做咗10+年電視地產記者,又窮又奄尖喺香港上車無期,幾廿歳學人尋自由玩劈炮,乜都試又睇吓會唔會餓死?

Facebook專頁:

https://www.facebook.com/carolngyy

探索驚奇精彩的 wONdEr 故事,請LIKE 我們的Facebook Page,並設定為「搶先看」: https://www.facebook.com/wondermedia.hk
熱門新聞
  • 【藝員揸貨車賺錢】幾千蚊底薪唔夠生活 《特技人》糯米:要照顧輕度弱智家姐(足本版) 79,407 views
  • 【藝員做經紀實錄】吳麗珠不屈不撓做地產 炒樓輸晒血汗錢:做人穩定好(足本版) 51,333 views
  • 【壹經典●港姐入豪門深似海】一千萬禮金飛上枝頭 朱玲玲豪嫁霍震霆再嫁羅康瑞(足本版) 48,378 views
  • 【壹經典●富豪咁玩齊人福】霍英東元配低調 二太陪應酬 三太神隱(足本版) 48,021 views
  • 直擊【《特技人》糯米】朱晨麗細佬方紹聰為生活揸貨van:梗係為錢啦 !職業無分貴賤(足本版) 47,422 views
  • 【恐怖廢氣腐皮】食店停車場晾腐皮勁污糟 記者踢爆老闆發難渣(足本版) 39,786 views