< 返回
  • 【大學畢業做乜好】地理系畢業賣波鞋 店主唔理家人反對:做到被淘汰先算
  •   9,885 views │ 2017年07月18日
    留言()

 

「我最多同學都係會投身番教育嗰邊,即係中學老師或者助教。」波鞋店店主Alan二○一五年地理系畢業,甫離開校園就與同學在觀塘開設波鞋店,「好多嘢都係自己親力親為,自己落手做,可能會識多啲,學多啲,決定權喺自己手上,發揮空間大啲。而且工作量可能會比投身教育工作嘅同學輕鬆,時間又比較彈性。」

他回想,讀書時曾幫人補習及當兼職售貨員,又在網上售賣波鞋,發現賣波鞋可能是一條賺取生活費的出路。直到畢業,他因讀書期間囤積太多波鞋,畢業要搬離大學宿舍,只好找個地方安置堆積如山的波鞋,把心一橫,將網店變成實體店。

波鞋店盛行,要突圍而出除了靠價錢,更要靠款式,所以Alan特意從美國入貨特別版New Balance 998波鞋,顏色是獨一無二的自訂色,定價約九百至一千,比專門店便宜數百元,「佢哋(客人)見我哋個價錢可能平少少,吸引少少,有啲款可能係出面其他鋪頭無嘅,變咗佢哋可能要搵我哋先買到。」

波鞋店收入不穩定,大時大節前可能有較高生意額,但節日後的收入,隨時比普通打工仔還要少。波鞋店位於觀塘工廈,設兩個鋪位,一間是展銷室,一間是貨倉,租金合共八千元。

Alan坦言,開店使他有財政壓力,擔心收支不平衡,甚至有種「追數」的心態,「就算生意差嘅時候都有一筆固定支出,租金同廣告。咁你每個月就規定自己要賺到呢個數先,賺完之後又要諗俾屋企嘅家用,俾幾多,驚每個月賺唔到自己想達嘅目標。」

Alan是家中幼子,暫無養家壓力,但兩年前決定創業時也曾遭家人反對:「佢哋覺得你讀完個Degree出嚟,咁就唔搵份正職做,走出嚟自己膽粗粗咁創業,開間波鞋鋪,又同你讀嘅嘢唔相關。」幸而波鞋店至今仍未曾出現赤字,令他更加有信心繼續做下去,家人現在也只會提醒他要留意囤貨量。

「到嗰一日,呢個行業淘汰咗我哋,或者已經太多、氾濫,做到嗰一年真係生意額好差嘅,或者真係未如理想,咁就可能結束咗我哋呢個創業夢。」穿著新款波鞋的Alan一邊向客人介紹波鞋,一邊當模特兒直接展示波鞋的穿搭,將自己的興趣融入工作,享受著創業這場冒險之旅。

採訪:羅霈潁
攝影:莫智謙

相關連結:
【大學畢業做乜好?】求職平台創辦人醒你兩招 「僱主最著重唔係你讀乜科」
http://bit.ly/2tk9eii

熱門新聞
  • 李明蔚經歷42次電療化療 馬浚偉助出碟圓心願 48,156 views
  • 對住老公皺晒眉 47歲陳慧珊面色枯黃keep唔到 41,669 views
  • 【台慶唔戒奶】邵佩詩八字波最夠薑 陳凱琳最露骨 40,250 views
  • 【遇到好人的士佬】陳少霞左巨鑽右珍珠 伸一伸手貴過人 36,512 views
  • 【繞場壹週EP12.1】見陳茵媺擘髀甩骹 周家蔚輸得心服 35,186 views
  • 42歲高齡趕生B?丘凱敏fit到漏肚腩都冇個 33,355 views