< 返回
  • 【壹週刊月底易手●壹個時代的終結】迷你倉逼遷丟創刊至今珍藏 資深訂閱讀者 : 早知賣盤死都唔丟
  •   13,928 views │ 2017年09月27日
    留言()

 

壹仔能夠走過二十七個年頭,全賴讀者的支持。到今日,當大家已習慣上網閱報,仍然有不少讀者訂閱實體版,當中更有不少由創刊支持到現在,除了來自香港,原來讀者亦遍布世界各地,除了美加、英澳,也有來自挪威、葡萄牙,哥斯達黎加和厄瓜多爾。今日,趁着這個機會,親身致電多個讀者,多謝你哋支持。

張女士:裝滿六、七袋紅白藍壹仔

壹仔於六四後創立,當時知道黎智英會創辦壹仔,就決定要支持。我今年六十七歲,由創刊買到今時今日,我會儲起每期書,二十多年來已儲了六、七袋大紅白藍膠袋。最欣賞壹仔政治旗幟鮮明,敢揭露內幕黑幕,無論是商界、政府還是娛樂圈。為了這些寶物,我特地每月用一千五百元租了一個幾十呎的倉,主要擺放《壹週刊》及少量其他雜物。可惜一年前因業主逼遷,朋友無法收留,我迫於無奈將珍藏多年嘅「寶」扔掉,只留下了數本,好肉痛呀,如果當時知道壹仔會賣盤的話,「死都唔會掉。」

Jessica Wong :係你哋先夠膽做

由第一期就開始睇,已經由中學生變咗個阿嬋。記得當年送柏林圍牆石紀念品,我好想要呀!後來有段時間離開了香港,回港後再次拾起壹仔,最愛看人物專訪、踢爆高官醜聞。有一期書我一直保留至今,那是二○○三年的第714期,原因是林振強先生最後一期;我由細到大都係林振強粉絲;我還記得600期的封面「老老嫩嫩打野戰」,搞笑生動。說真的,有很多故事,只有壹仔夠膽做。

R先生:鍾意壹仔暢所欲言

我○一年就開始訂閱你哋網上版,喂,當年好有reputation,份份報紙都係跟住你哋走。我做金融嘅,好鍾意睇你哋踢爆金融圈嘅秘聞,當中好多嘢,我哋都聽過,不過你哋暢所欲言,唔會就住就住,嗰下過癮。我網上訂到出年三月,賣咗盤都要睇多半年,如果太過保守、又鱔嘅話,就唔會繼續再睇㗎喇。

黎先生:唔睇追唔上潮流

我第一期就開始買《壹週刊》,記得創刊初期聲勢浩大,好轟動,以前冇人出一本咁嘅雜誌,好多爆料,嗰時唔係好興,係你哋開始做起。《壹週刊》嘅爆料,係每個人茶餘飯後的話題,你唔講《壹週刊》裡面講啲嘢呢,就好似冇嘢傾偈咁,追唔上潮流。我最喜歡《壹週刊》嘅招牌調查報導,同早期嘅專欄作家,如林振強寫嘅專欄。壹仔賣盤,好可惜。

麥耀邦:日趨單薄都要買

壹仔實在太多經典的報導,絕對是傳媒中人持續學習與進修的必然教材。如○一年臨近秋天的「毒蟹襲港」報導,即使當時我在電腦雜誌工作,與時事新聞關係不算太大,但這篇報導仍令同事們愛不釋手,更誓言要做出如這一篇一樣引起社會關注的報導。其後的《非常人語》更是撰寫人物訪問必學教材,我為《信報》或《東周刊》撰寫人物訪問時,也是模仿《非常人語》的寫法。

即使在今日我教導學生撰寫人物訪問,也是以《非常人語》內的陳炳麟、勞永樂及李鵬飛等訪問作模範。○二年在《東周刊》財經組工作時,多次與《壹週刊》撞題目,無論以內容或文筆而論,都是《壹週刊》更勝一籌。

我堅持每日要買一份報紙,這份就是《蘋果日報》;也堅持每星期買一本雜誌,當然是《壹週刊》,即使一報一刊已日趨單薄,這個習慣仍然風雨不改。

趙先生:最鍾意睇你哋寫誠哥

最初嘅《壹週刊》唔單止又多故事又多圖,零舍抵睇,最緊要係咩都唔驚。你哋唔單止係同政府對着幹,我印象最深刻就係,你哋最鍾意爆李嘉誠啲唔開心嘅嘢,隔一陣又爆一次。有時我都諗,點解你哋好似同佢十冤九仇咁㗎呢?但你哋就係敢講真相。

不過睇住你哋愈嚟愈薄,我都曾經諗過唔訂㗎。但醒起早期仲要親自去換書嘅年代,我屋企工人有次唔小心,一次過整唔見晒我成年嘅換書券。我撩咗幾隻字,fax去你公司,睇吓有冇辦法俾番我啦。點知你哋二話不說,咩都冇問就寄番晒俾我。係呢種讀者同雜誌之間嘅信任令我訂到今日。

何先生:不受紅色資本干預

你睇番我用戶編號,排得好前。當年創刊唔夠一年,我就開始訂書,一睇就睇咗廿年。新聞內容夠正,最吸引到我追睇,時事方面會着眼多啲,娛樂八卦較少睇。

聽到賣盤消息,我好失落。呢個世代,好少雜誌仲反映到時事、政治的現況,大部分都已經受紅色資本干預。我一直支持民主派,睇嗰啲雜誌做乜先?

暫時唔會再訂《壹週刊》,我對新老細冇乜信心,覺得佢只係打手。基本上佢又唔係行內人,識做咩?佢做咩出身,你睇得到,都擔心佢會影響編採自主,風格立場會唔同晒。咁多年來,我只係睇壹仔、《蘋果》,依家少咁一份。希望呢個決定,真係成功「賣母救仔」,維持到《蘋果日報》。已訂嘅書我會拎埋佢,但視乎以後新壹仔嘅路向,太偏頗,我只會拎嚟墊枱食飯。

林先生:浸住浴睇壹仔

廿多年的揭書習慣,突然之間冇咗會有啲失落。我睇咗《壹》仔廿幾年,由創刊睇到依家,從未間斷。當年睇咗四、五期,就開始訂埋書,每期都睇晒。我偏好時事財經,好少睇八卦,不過我都會睇埋B書嘅豪語錄。

《壹》仔風格好特別,九○年七月開始搞偵查報導,對我影響唔大,但影響社會深遠。我好記得第十七期,踢爆當時任交諮會主席譚惠珠持有家族的士公司股份而未有申報,涉利益衝突。當年,佢係「四料議員」,我好欣賞佢。佢一直親港英,點知無耐,佢就極速轉軚親中,令我跌晒眼鏡。

以前過時過節,雜誌成本電話簿咁厚,依家得番十幾個廣告。雖然唔係每篇新聞嘅觀點,我都完全認同,不過我仍然會俾錢買書支持發聲。每個星期三拎完書,我習慣浸住浴時睇壹仔,我對新接班冇信心,佢乜都無承諾過,到期後我唔打算再訂。

報紙檔檔主:試過有富豪派人掃書

接觸《壹週刊》最多的,除了一眾員工外,相信可數報紙檔的檔主。壹仔賣盤在即,他們又有何特別的回憶呢?

敢言一直是壹仔的標記。在灣仔擺檔的陳生自己以往也是《壹週刊》的擁躉,最喜歡壹仔的「踢爆」古仔,更指壹仔的敢言是其他雜誌沒有的。陳生憶述,數年前有一期壹仔的「踢爆」古仔出街後,當日下午就有被踢爆的富商派人來到檔口,指其老闆吩咐要買斷壹仔,一口氣在他的檔口買了一、二百本《壹週刊》。

相關連結:
【保證金加多2000萬限5日內支付】未能如期下周四易手 《壹週刊》賣盤延至10月底完成
http://bit.ly/2fQijGI

【封面●壹週刊27年傳奇】末代總編輯黃麗裳:就算死,都要死得有台型!
http://bit.ly/2fQviYQ

【封面●壹週刊27年傳奇】我們由記錄歷史 變成締造歷史 左少珍
http://bit.ly/2y5azvo

【封面●壹週刊27年傳奇】搖樹文化 讓人不易滿足現狀 陳貝琼
http://bit.ly/2fvBhpe

【封面●壹週刊27年傳奇】我們從錯誤中學習,不是從盤問中決策 張劍虹
http://bit.ly/2jXQBMO

【封面●壹週刊27年傳奇】記者難管 我管結果 李科儀
http://bit.ly/2yq9KJE

【封面●壹週刊27年傳奇】忠實讀者泰國助採訪 入殮房影尖東之虎遺體
http://bit.ly/2foTe5d

【壹觀點】臨別殷勤重寄詞
http://bit.ly/2wSW2mi
熱門新聞
  • 【14個月大Kelly似媽咪】鍾嘉欣同老公十指緊扣返加國 82,652 views
  • 【醫生與您】逆轉針劑 56,294 views
  • 【開心速遞隻鬼冇咗】不甘俾大台玩 顧紀筠兒子冇癮解約 53,923 views
  • 一絲不掛出書爆大鑊 袁嘉敏堅係唔撈娛圈做OL? 52,048 views
  • 重提李思捷委屈爆喊 春卷:捧到佢上天,最後忘記咗你 50,048 views
  • 【3日2夜】羅敏莊帶團泰國睇樓 捧60萬豪裝物業 41,598 views