< 返回
  • 【壹週刊FB Live】屋企著性感內衣? 周慧敏:唔係我style
  •   7,826 views │ 2017年10月06日
    留言()

 

永恆嘅玉女周慧敏,將於明年一月廿六至廿八日舉行一連三場《一萬天荒愛未老 周慧敏30周年演唱會》,琴日,Vivian破天荒同壹週刊玩咗廿幾分鐘嘅facebook live,答咗好多fans即場嘅提問,想知佢答咗咩?可以上壹週刊facebook專頁睇番。

第一次同壹週刊做facebook live,Vivian:「Hello,大家好,我第一次來到你們這裡做live,你哋有咩問題可以打入去,然後我們有專人負責,好多雙眼看着你們嘅問題,然後就問我。」

好多Fans都想知道,究竟Vivian喺演唱會上,會唔會同王馨平、湯寶如合體齊唱經典兒歌《美少女戰士》,Vivian笑住話:「當然會啦,唔唱嘅話,我唔敢開呀!差唔多六月嘅時候,嗰個電視節目(《流行經典50年》)都未請我哋三個上去嘅時候,我已經覺得 因為以往喺我嘅show裡面冇做過呢啲,我自己唱過,兩次都係自己唱,我哋三個就未試過合體,我覺得其實30周年演唱會,應該係要讓一啲經典重現,特別係從未出現過,所以我已經約咗Karen(湯記)、Linda(王馨平),請佢哋擔當我嘅嘉賓呢個角色,佢哋好爽快,即刻就應承咗我,我就已經安心,因為係今次一個重點嘅部分,就已經很快OK了。」

仲記得06年,Vivian復出開咗三場《周慧敏back for love演唱會》,當年,倪震扮貓上台俾驚喜Vivian呢幕經典畫面,唔知佢個入行三十周年個唱上,老公倪震會唔會再扮貓上台呢?「我覺得經典嘅場面係唔會再發生,咁先係一個經典場面,我覺得老公唔會再出現喺台上,佢唔會再有呢個驚喜給我,因為佢已經俾咗我呢個驚喜,仲有佢上次真係以為我嗰次係最後一次演唱會,佢係咁諗,我諗佢今次 我都唔會咁麻煩佢,佢安心做觀眾去睇我,做一個丈夫角色,其實已經係最大嘅支持。」

下個月便踏入五十歲嘅Vivian,凍齡秘方竟然係工作,佢話:「凍齡秘方,我覺得係keep住適量工作,我唔係好active,但係keep住適量工作,真係幫到我保養,令到自己後生啲,因為你同社會有個步伐可以一齊向前行,你唔會令自己脫節,令到自己可以有一個調節能力,所以喺活力、動力上面都可以維持到一個令到自己可以後生啲,包括心境都可以年輕,心境年輕嘅時候,亦可以影響到你嘅外觀,不過講到尾,我覺得凍唔凍齡真係不係最重要,因為其實每一個人都會aging,始終有一日都會老,我會接受有一日我真係變老,唔再是大家依家見到我咁嘅樣,你哋唔會再讚我凍齡,可能會有呢一日,但係自然嘅,我覺得唔會違反自然定律,我寧願自己優雅地老去。」

Vivian係好多人心目中嘅女神,大家都好想知道,究竟佢喺屋企係著咩嘢睡衣款式,卡通睡衣?性感內衣?Vivian話:「兩樣都唔係,性感內衣唔係我style,千祈唔要送俾我,女朋友生日禮物嗰啲都唔使,我又唔太喜歡卡通、cute那種,其實保暖好重要,喺屋企會著好多衫,我鍾意著有領衫,暖暖咁保護自己瞓覺,似運動裝那種,喺屋企鍾意著呢種衫。」


優雅是Vivian的標誌,一舉手一投足也有她的韻味。
事前已將部份fans想問Vivian的問題,放在箱內讓Vivian抽問。
每個fans的提問,Vivian都很認真回答。
周慧敏三十周年演唱會,將於明年一月廿六至廿八舉行。
熱門新聞
  • 【14個月大Kelly似媽咪】鍾嘉欣同老公十指緊扣返加國 82,778 views
  • 【醫生與您】逆轉針劑 56,294 views
  • 【開心速遞隻鬼冇咗】不甘俾大台玩 顧紀筠兒子冇癮解約 53,952 views
  • 一絲不掛出書爆大鑊 袁嘉敏堅係唔撈娛圈做OL? 52,063 views
  • 重提李思捷委屈爆喊 春卷:捧到佢上天,最後忘記咗你 50,073 views
  • 【3日2夜】羅敏莊帶團泰國睇樓 捧60萬豪裝物業 41,616 views