< 返回
  • 【wONdEr|裝修有法】細碼獨立屋漏水失預算 妙計建套房增通風
  •   8,332 views │ 2018年05月17日
    留言()

 

「業主本身想一買即住,但後來發覺屋內出現漏水情況,而且幾嚴重,所以索性搵我哋重新設計。」E F Design設計總監馮建耀(Eric)有二十多年的裝修設計經驗,是次負責的單位為大埔老牌洋房屋苑內的一座兩層高獨立屋,實用面積一千三百呎。單位間隔寬敞,客廳、飯廳、開放式廚房至花園連成一線,在大門位置已能看穿全屋,空間感十足。屋主是從事飲食生意的香港夫婦,育有兩名女兒,本先只預花錢點綴大屋,卻被漏水問題打亂計劃。「處理漏水工程開支令佢哋失了預算,所以今次嘅挑戰係要盡量用原有設計同裝修節省成本,打造北歐風格。」

留地磚加風扇
「有啲去水渠位同入牆渠已經穿咗,甚至有滲水到隔壁單位嘅跡象。近住大門口位置同樓上露台都有出現呢類情況,想一勞永逸就要徹底去做,將藏牆的水喉同電子線一次過修復及更換,咁樣就可以用多起碼八至十年。」此等步驟工程大,需時長,整個裝修總進行了半年。有見屋內的地磚仍很新淨企理,Eric決定以此為依歸配搭色調。「我保留了客廳深灰色地磚同廚房木紋地板磚,牆身等位置因此用灰色同銀車線,喺用色上平衡整個空間。」

開放式廚房及飯廳位置的玻璃屋為上手業主留下之產物,在陽光灑照下吃早餐確是份外醒神,甚有渡假感覺;但再寫意也難敵炎夏高溫,令玻璃屋仿如半個蒸籠,享受變難受。「熱力由太陽照射落嚟,有入無出,困住喺玻璃入面。」Eric認為單靠冷氣既不環保,又會浪費了屋外清新的空氣,因此在天花位置加設了兩個歐陸風的連燈吊扇,以加快空氣流通,把熱氣打回出去。「我另外喺玻璃屋頂上面加裝了伸縮帳篷,如果真係有四十度高溫,起碼可以擋住陽光幫忙降溫。」屋主能用搖控方便地決定帳篷的伸縮幅度,操作簡單。

男人的浪漫
單位本先只靠花園一邊供光,因而導致兩邊光線不均,大門位特別陰暗;Eric大膽地把門口旁的牆身拆去,改為落地玻璃,令玄關位置頓時變得開揚,而原先的車房更改建成男戶主的天地。「男戶主都有揸車,但指私家車並唔係佢命根,相反單車先係。」屋主願把私家車泊至屋外以換取他的另類車房,Eric在牆身增添大大小小的單車掛鉤,以放置多達十多部的單車。男人的浪漫又何只得一樣,男戶主閒時亦愛打拳。「我專登喺呢個位置留個空間掛起大沙包,俾佢喺到玩自己鍾意嘅運動。」

自制套房衣帽間
一樓的位置分別是兩姐妹的房間,由於單位屬細碼獨立屋,因此每層空間僅而夠用,不能作太大改動,但大女一直有個小小心願,Eric今次則巧妙地幫她達成。「家姐她希望自己有一個套房,但呢層樓本身只有兩間房一個廁所,所以我就喺佢房間向住廁所個邊開咗個門口位,變成有假套房。」大女能在私人門口進出洗手間,而妹妹則可以在正常門口進入,無阻其使用。

二樓的位置為主人房,也是一屋最頂層,Eric最後要處理的就是女屋主的要求。「間房原則不大,放咗King Size床後就唔夠位放衣櫃,所以我將露台位置改為衣帽間。」單位屬尖頂屋,並沒天台,而尖頂中間有條橫樑,躺上床後難免有「橫樑壓頂」的感覺,Eric因而把橫樑原有的位置封起,並於封口的兩邊作流線型傾斜,成功在不改變屋頂的高度下化解壓頂情況。

獨立屋注意事項
有別大廈屋苑式的管理,獨立屋的外牆漆面、屋頂及屋外水喉等全屬屋主保養範圍,Eric提醒買家在購入時要先了解情況,知道相關風險及開支。「獨立屋另要處理嘅問題就係樓梯,樓梯級嘅物料各有效果及作用。」是次設計師則為屋主選用了實用性強的物料 - 地氈,「鋪地氈好處有好多,一嚟價錢平,第二無咁滑相對較安全,第三就係會吸音,令到行樓梯時不會發出太多聲音。 」

採訪:黃綺敏
拍攝:廖健昌
熱門新聞
  • 【歌星悲歌】面對現實屯門做小販 黃翊:的確係難堪 (足本版) 81,534 views
  • 【壹經典●富豪去盡因為愛呀】大劉爬20層樓幫嘉欣搬行李 同許晉亨鬥愛登報表白「The One」(足本版) 71,387 views
  • 【港女冇人愛死因】港女自白玩Speed Dating鋪鋪食白果 原來衰呢幾樣嘢 .(足本版) 58,638 views
  • 【特權明星】揸二百萬瑪莎拉蒂出巡 佘詩曼買飯煲專人安排插隊(足本版) 54,619 views
  • 【壹經典●富豪新歡舊愛同屋】李嘉欣入老公寓所過夜 何超瓊急撤出許家花園台(足本版) 45,953 views
  • 【每日壹爆●富豪女友好富貴】呂麗君收大劉20億掟煲費 掃渣甸山烏燈黑火豪宅(足本版) 44,127 views