< 返回
  • 我很醜 但我嘅愛好長久|康仔
  •   14,058 views │ 2018年08月10日
    留言()

 

成日話睇人唔好睇外表,呢句說話相信好多人都認同,但如果放落男女關係度,樣衰真係好輸蝕,起碼識女仔就已經難關重重。康仔老死阿星係肥仔一名,加上滿面鬚根同埋一塊多油到可以煎牛扒嘅油面,確實係幾趕客!

不過圍內同事都知道,阿星絕對係好仔一名,唔煙、唔酒、唔嫖、唔賭錢,工作又盡責,仲要精通皮革手工藝,論人品同性格真係冇得挑剔。奈何外表問題,令佢成30歲人都仲未拍過拖。

阿星唔係冇嘗試過,交友app、speed dating、做兄弟嗰時拎姊妹電話統統都做齊,依然無功而回。有唔少同事都介紹過女仔畀阿星識,但一send阿星張相畀啲女,個個都冇晒回音。

世界就係咁現實、咁殘酷,加埋早幾年公司裁員,阿星向康仔慨嘆咗句:「工又係咁,女又係咁,想跳樓呀!」嗰刻,康仔完全感受到阿星有幾灰,可以嘅話我都想介紹個妹畀呢位好男仔識,可惜康仔係獨子嚟......

衰運唔會行一世,30年嘅枯燥生活終於捱過,阿星唔知從咩渠道識咗個女仔返嚟,佢兩個亦都好快撻著。康仔問阿星拎過相嚟睇,個女仔唔係靚女,有少少肥,不過有樣嘢可以肯定,就係呢個女仔好幸運。因為佢遇到一個擔屎唔偷食,會將儲埋儲埋30年未拍過拖嗰份浪漫、心機同激情投放晒落佢度嘅男仔。就正如一位久未落場嘅球員一樣,一定好「餓波」,佢實會交出120分努力去拚搏、去享受比賽,打出身價。

個女仔夠膽「啃」 吖!唔係,係夠膽唔以貌取人去欣賞阿星嘅內在美,絕對係明智!家陣睇見阿星個IG狂放閃,嗰啲Facebook旅行po又留埋啲「+1」留言拎行程安排,就知佢係幾重視呢段感情。

與其去羨慕人哋條仔幾有錢、幾靚仔同幾大隻,倒不如畀個機會去了解追求者嘅性格同人品。康仔認為,有個肯為你付出同真心真意對你好嘅男人,先最羨煞旁人,放低外在美,畀好仔一個機會啦!

專欄作者簡介:

康仔

日頭返工攤抖,例牌遲到早走,收工約Friend飲酒,放假陪女玩狗。

一日冗員,一世冗員,我是康仔。

Facebook專頁:

https://www.facebook.com/mynameishonghong/
熱門新聞
  • 【每日壹爆●銀城吸煙惡女】直擊店員商場內狂煲煙 被指阻塞通道即鬧爆保安(足本版) 78,429 views
  • 【每日壹爆●青龍教秘中秘】億萬富婆為賣淫集團煮飯 高級督察揭她是誰......(足本版) 64,332 views
  • 【港版TFBOYS ? 】《全民造星》Mr.Jan 童顏搶晒鏡 劉美君話唔做戲嘥晒! 55,841 views
  • 【赤裸的女人】34歲天體港女:著衫好束縛唔舒服(足本版) 54,145 views
  • 【經典●張栢芝接江湖姦殺令】吳雪雯唔接戲被圍毆 蔡慧敏被禁錮72小時 (足本版) 52,960 views
  • 【呢頭離婚嗰頭來港陪Niki】為38歲周麗淇 軍部演員傅程鵬甘做泊車仔(足本版) 51,814 views