< 返回
  • 【獨家●業主大反擊】業主出示租單反駁陳展鵬「一個月通知可退租」「煤氣爐我畀錢嘅」(足本版)
  •   45,456 views │ 2018年06月14日
    留言()

 

關於陳展鵬租住將軍澳維景灣畔一個單位嘅租務糾紛問題,又有新進展!事關業主再度聯絡《壹》仔,又提供租約、單據等證明文件,指陳展鵬向傳媒所講嘅「一個月通知可退租」、「更換熱水爐」等問題,令到佢「真係唔明白」,仲話陳展鵬要求換嘅嘢,業主都出錢換俾佢,包括$88嘅窗簾嘅路軌,業主又反問:「陳生幾時有俾過錢呢?」

日前陳展鵬出席大台劇《天命》活動時,準備好晒WhatsApp截圖澄清,又否認毀約,仲向傳媒聲稱「租約列明一年內退租,只要提前一個月通知,兼賠一個月租金就可離開」。不過,業主就提供白紙黑字寫明、有晒雙方簽署嘅租約,咁樣回應:「陳生同傳媒講合約寫明:『若一年內租客唔滿意,一個月通知就可以搬走。』但我睇唔到有呢一條。租約當時係陳生提供嘅,內容睇清楚先至簽架啦。」

既然各執一詞,不如就放大張約睇真啲,咁就清清楚楚了然。

租約第一項寫明:「由2017年5月1日起至2019年4月30日止。規定租客在租用期內不得退租,否則按照所餘租期之時間賠償租金。如租客在租用期一年內退租,業主有權扣除一個按金之數目以彌補損失。」

另外關於「退租」嘅條款仲有第二項:「租約期滿,住客如繼續租賃或退租,須於一個月之前以書面通知。」

至於有報導轉述陳展鵬嘅說話:「我屋企最緊要係個煤氣爐,因為我媽咪冬天洗碗、洗手用凍水對手會好凍 最後係我自己搵煤氣公司搞,我畀錢嘅。」

業主就咁樣回應:「一月份我收到佢嘅通知,佢就話傭人房熱水爐壞咗,佢要俾傭人用。咁我就通知佢,因為煤氣單係陳生個名,於是叫佢搵煤氣公司上嚟更換,費用就由我出。過咗一段時間,佢就話煤氣公司換唔到,叫我諗辦法。咁我就去賣熱水爐嘅公司幫佢換咗一部,費用係由我俾嘅,我有單有據,陳生幾時有俾過錢呢?」

根據WhatsApp截圖顯示,陳展鵬一方的確喺2018年1月2日向業主表示「熱水爐用不到,請安排維修師傅」,而業主提供嘅單據就證明喺2018年2月28日用現金$3899幫有關單位買咗12L熱水爐,並於2018年3月2日成功安裝。

業主仲強調陳展鵬係個對數目好清晰嘅人:「初初租俾佢嗰陣時,佢好多嘢更換都係由我俾錢嘅,好似窗簾嘅路軌呀,$88佢都叫我俾,我都俾咗佢,證明陳生數目好清晰嘅。」又補充:「喺呢件事上呢,其實我真係唔想搵傳媒嘅,因為陳生斷晒我哋嘅聯繫,封鎖晒,我搵唔到佢哋,就做縮頭烏龜,咁我無辦法同佢協商,咁我先至搵傳媒協助我搵陳生協商。」
熱門新聞
  • 【港版TFBOYS ? 】《全民造星》Mr.Jan 童顏搶晒鏡 劉美君話唔做戲嘥晒! 102,974 views
  • 【經典●張栢芝接江湖姦殺令】吳雪雯唔接戲被圍毆 蔡慧敏被禁錮72小時 (足本版) 71,874 views
  • 【每日壹爆●青龍教秘中秘】億萬富婆為賣淫集團煮飯 高級督察揭她是誰......(足本版) 68,518 views
  • 【赤裸的女人】34歲天體港女:著衫好束縛唔舒服(足本版) 56,651 views
  • 【冇何傲兒繼續爺孫戀】八十歲林建名認食藥 拖日系少女睇Hello Kitty (足本版) 54,664 views
  • 【一代艷星51歲啦】靚樣拍得住邱淑貞 艷星吳雪雯keep住又白又滑 (足本版) 50,621 views