< 返回
  • 面斥不雅|我做Marketing - Michael & Derek
  •   5,027 views │ 2018年08月10日
    留言()

 

早前睇咗黃子華嘅「金盆𠺘口」,當中提到「面斥不雅」嘅價值觀。的確,整個社會連同職場,懂得「面斥不雅」呢個道理嘅人已經買少見少。

「面斥不雅」之所以優雅,係因為就算唔講出口,大家都知道應該要點做。咩應該做、咩唔應該做,大家心知肚明。當大家活喺呢個時代,擁有一班「心照」嘅同事,工作同溝通理應比較輕鬆,因為大家都擁有基本「知識」、「常識」同「共識」,工作時自然唔需要再花時間解釋。

要做到「面斥不雅」嘅文化,大前提係大家都擁有同一套價值觀,堅持同一個信念。面對大是大非、對與錯都有一份堅持,擇善固執。

睇show當晚,黃子華問現場有邊個觀眾唔知咩叫「面斥不雅」,坐喺我後面嘅少女隨即問身旁嘅朋友:「面『色』不雅?咩嚟㗎?睇人面色咁解呀?哈哈。」

無可否認,香港「面斥不雅」嘅文化正逐漸瓦解。換嚟嘅社會主流叫「直斥其非」—— 所有嘢都要指名道姓,畫公仔畫出腸,其他人先可能會明白。當你喺火車上見到一排obviously只能容納四個成人嘅座位,但港鐵近年仲要特別喺座位上標明「4座位」,你就知道香港優雅而內斂嘅文化已經岌岌可危。

當「直斥其非」文化一路壯大,本身懂得「面斥不雅」嘅優雅之士亦可能會喪失自身風度。有時為咗維護自身利益,仲可能要歇斯底里。壞嘅文化同修養就好似傳染病一樣,一個傳一個,不知不覺地互相感染。從此,「面斥」亦再無所謂「不雅」。

不過,有時就算你兜口兜面直斥其非,對方依然不為所動,情況亦未必會有改善。去到最壞情況,大家已經再無力氣開聲,因為就算出咗聲,都只係徒勞無功。當大家嘅底線一次又一次被推後,後到無路可退時,有人會索性將底線剪斷。心灰意冷,唔再執著對與錯,是與非亦再與自己無關。

唔忍心呢個情況出現?最簡單直接,就係從自己做起,略盡綿力。

當我聽到身後嘅少女問咩叫「面斥不雅」時,我即刻擰轉頭同佢講:「即係有啲嘢,講到明就譖,大家心照就ok。明唔明?」

少女有啲愕然,似懂非懂咁點點頭。

專欄作者簡介:

我做Marketing

由Michael及Derek兩位marketer創立的媽劇停平台。撰寫市場及職場文章。著有《我做媽劇停》及《暖男之道》。

Facebook專頁:

https://www.facebook.com/iDoMarketingHK/

探索驚奇精彩的 wONdEr 故事,請LIKE 我們的Facebook Page,並設定為「搶先看」: https://www.facebook.com/wondermedia.hk/
熱門新聞
  • 【藝員揸貨車賺錢】幾千蚊底薪唔夠生活 《特技人》糯米:要照顧輕度弱智家姐(足本版) 79,893 views
  • 【藝員做經紀實錄】吳麗珠不屈不撓做地產 炒樓輸晒血汗錢:做人穩定好(足本版) 51,945 views
  • 直擊【《特技人》糯米】朱晨麗細佬方紹聰為生活揸貨van:梗係為錢啦 !職業無分貴賤(足本版) 47,644 views
  • 【恐怖廢氣腐皮】食店停車場晾腐皮勁污糟 記者踢爆老闆發難渣(足本版) 42,497 views
  • 【原本住大坑】為討好外父 鄭嘉穎2400萬進駐何文田(足本版) 40,625 views
  • 【經典●黃桂芬生前】喜歡逗留書房沉思 家中掛字畫做人「常存厚」(足本版) 39,793 views