< 返回
  • 【棄養校園狗】認一年前已搵人認頭 校長:無做過任何承諾!
  •   18,868 views │ 2017年07月20日
    留言()

 

明愛元朗陳震夏中學新校長上場之後,就將兩隻校園狗「灰奇」和「黑奇」棄養,被批評無法以身作則,又將前任校長的承諾拋棄。歐陽麗琼校長開腔回應,強調學校從無向狗義工作任何承諾,現在已經找到家長領養牠們。

歐陽校長不忿被坊間留言中傷,向《壹》仔澄清,稱以她所知,學校領養狗狗時無向動保組織作過承諾,「據我調查就冇呢件事,因為我新接手,我問返同事,佢個講法係冇任何承諾,包括白紙黑字、包括口頭。我唔知嗰啲愛護動物團體,係咪有約定俗成諗法啦。」這個講法與早前動保組織稱,前校長承諾不會棄養及妥善照顧狗狗的講法有出入。

歐陽校長坦言,去年上任後已打算送走狗狗,上月發生黑奇「咬傷」學生疑雲,就成為導火線。她解釋當時有學生打籃球時被狗弄傷,曾稱有閉路電視佐證,今次就稍為改口風,「個鏡頭就真係啱啱個位睇唔到,總之一秒鐘(雙方)擦身而過之後,個學生就趷趷下隻腳,隻狗就走左去。」而她見黑奇當時張開嘴,事後學生傷口有血痕,當時便斷定是黑奇咬傷,「係咪叫咬我真係唔知點界定喇,『所以就冇咬,但係曾經令學生受傷囉』,咁講會唔會好啲呀!」

校長又發表聲明,表示已為狗狗覓得十分理想的新主人,該家庭是村屋,有前後花園,對狗狗亦關愛有加,「佢哋條件實在係太過優勝喇,好過我地十倍、一百倍」。她深信狗狗會受良好對待,拒絕承諾當牠們生活出現問題時會接回。

兩年前將黑奇交託學校的動保組織「Animal Saver HK」成員Ricco,早前向《壹》仔為校長辯解,轉述有老師稱校長棄養狗狗的決定,是多次接到投訴及受校董會施壓才作出此舉。但校長斬釘截鐵否認,「校董會冇畀任何壓力我,我嘅壓力係來自你哋啲人喺度亂咁唱㗎啫!」

Ricco與校方多次交涉,原定今個星期取回黑奇,現在得悉學校已物色新主人,就擔心牠們的居住環境是否合適,「我從來冇反對過學校出領養,但係我要求家訪,如果學校唔畀嘅話呢,咁你就唔好交畀人喇,你就交返隻狗畀我啦。」雖然她的要求被學生家長拒絕,但見學校態度誠懇亦願意讓步,「我可以退一步,由學校去監察,但係究竟個家庭會點樣養隻狗呢,學校又會點樣安排去家訪呢?」她為狗狗著想也設底線,要求狗牌仍然由校方保管一段時間,以觀察狗狗生活。若交涉順利,灰奇及黑奇將在星期六被接走。

Ricco慨嘆,黑奇是她交託流浪犬中,最花心血的一隻。因為當時她很認同前校長領養的用意及承諾,想仿效外國,以領養推動社區關注流浪動物,並教導學生承擔領養的責任。這兩年間他們自費聘請訓練員,幫助學校改善兩隻狗狗的行為,卻換來今天的棄養,「始終都係一個社區風氣問題,我覺得好多人唔接受社區動物,甚至乎一個校董讀咁多書,但係容納唔到狗,眼中覺得唔鍾意、覺得狗係影響學校,點解一有錯就係狗嘅錯呢?」

撰文:周展樑


相關連結:
【一朝校長一朝臣】兩年前收養唐狗做校園狗 新校長上場即棄養
http://bit.ly/2tdLKLq

【全民救狗】流浪狗頸項慘套上膠水管 動保人通宵拯救
http://bit.ly/2ttfu76


黑奇(Ricco提供照片)
灰奇(Ricco提供照片)
Animal Saver HK成員Ricco慨嘆,無法由校園帶頭關注社區流浪狗。(Ricco提供照片)
黑奇曾與袁彌明及慢必合照。(Ricco提供照片)
校長為兩隻唐犬物色新主聲明全文。
明愛元朗陳震夏中學
熱門新聞
  • 瘦身梁頌昕行性感 晒迷人pink bra 38,769 views
  • 【前度個個都靚】29號結婚請前度出席喜宴 鄧健泓:我未問李施嬅! 36,155 views
  • 【坎坷童年】蝦足4年 張文慈被飛仔用盡方法折磨 29,383 views
  • 王浩信視帝寶座危危乎 踩單車洩憤 28,814 views
  • 捕獲昔日新聞之花! 43歲黃德如依然省鏡 28,654 views
  • 鄧兆尊被阿三Mark到實 車厘子焗住做交際花 26,670 views