< 返回
  • 【快閃日本】$681即日來回東京 港女幾年遊日廿次
  •   75,452 views │ 2017年09月26日
    留言()

 

香港人愛去旅行,首選地為日本,近乎瘋狂程度;每個悠長假期,總有人計好日子,拖着行李快閃一轉。根據日本國家旅遊局公布,去年港人訪日人數高達184萬,即約四名港人就有一人曾去日本,創歷年新高。香港更是全球重遊日本次數最高的地區。

本刊專訪兩位八十後港男港女,踏入職場未夠十年,遊日次數已經超過二十次。曾在旅遊公司工作的阿貝,最高紀錄試過每月飛一次及即日來回日本;在工程界從事文職工作的青青,兩年花二十萬,遊勻整個日本郊區。

即日來回$681搞掂
「得一落機,坐車出市區,在車廂望住窗外的風景,覺得好神奇、好高興。」二十七歲的侯貝怡(阿貝),提起第一次坐飛機去旅行,面上帶着天真爛漫的笑容。「小時候,已經很喜歡和服,還有Sanrio公仔,一直覺得日本是一個很正的國家,好全面的靚。」

十年前,去旅行,對於一個普通家庭是一件奢侈的事,「細個無咩機會去唔同地方,都係最平的東南亞。」阿貝數數手指,童年出國次數不多於五次,「去過泰國、台灣,唔會年年去,十年先一次。」

【快閃日本】鍾情日本郊區靚景 港青兩年豪花廿萬 遊日十七次
http://bit.ly/2ypGFxM

打工半年 第一次遊日
「搵到第一份糧,覺得一定要去一次日本。」IVE畢業後,阿貝於電視台做PA。人工不高的她,工作半年,決定「用自己錢」踏足日本。「我第一次去係二○一○年,當時搭中國國際航空,仲要喺北京轉機去東京。」當年,未有廉航,為慳錢要轉機,「機票會平一點,都要二千五百多元。」機票加上酒店、車費,已經接近一個月人工。

「係直接拎嗰個月份糧就去玩,俾完機票、酒店已經冇錢。」第一次踏足日本,阿貝並冇太揮霍,反而比平常更節儉,「整個行程,最貴只是食一蘭拉麵,其他都係麥當勞。」二百日圓,一個包加薯條就一餐,「但當時好開心,因為終於去到自己好憧憬的地方。」東京之旅令她決定每年至少要去一次旅行。

一元機票 即日來回
二○一三年,掀起一場「廉航大激戰」,多間廉航在香港崛起兼鬥平,機票由數百元,至雙位數,甚至零元也有推出。來回連稅不用一千元,比傳統公司便宜一半以上。短途機,以日本航線最受港人歡迎,亦令阿貝更多機會遊日。

廉航慶祝成立一周年,推出一元機票,令阿貝挑戰即日來回東京。「真係無心插柳,當時以好抵的心態諗,我一定要買到,本身想買三日,但俾錢時被搶空。」最後只餘下一日,「諗咗一陣,其實一日都得,因為係凌晨機去凌晨機返。」

最後,阿貝與兩位朋友「Chur到盡」,各花了六百八十一元玩一日。他們凌晨四時到埗,先去築地食早餐,再到明治神宮外苑、代代木公園賞銀杏。下午再到涉谷及東京大學食午餐,最後在SKYTREE晚餐。直到晚上十一點返機場,凌晨一點機返香港上班。

參與過節目製作的阿貝,在一四年開始拍片記錄旅程。回港後,更開設《貝遊日本》專頁及頻道,以東京一日遊打頭炮。當時評論好壞參半,有留言更指:「咁辛苦為乜?」阿貝亦淡淡然,「佢套用了佢嘅思想在我身上,佢又不是我。」阿貝回望,仍覺得是一次難忘的回憶,「銀杏之前冇睇過,兩排銀杏樹,超靚。如果唔係有一日的機票,就不會睇到咁靚的畫面。幾百元,就可以咁滿足。」

一季去一次 香港零玩樂
幾年來,阿貝遊日超過二十次,由一年一次,至今一年三至四次。加上公司工作、旅遊局邀請及旅行,今年阿貝每個月也離港。慳家的阿貝表明,旅行只坐廉航,而且不會衝動亂買機票,一次旅行只花五分一或四分一人工。「四日行程只是用三千元就夠,機票酒店只要千五元。」若機票加行李,多於一千元,她不會入手,酒店亦是揀最平。

一年四次遊日,留在香港的時候,阿貝甚少外出,愛宅在家中,「唔係唔鍾意香港,我覺得香港好逼。好多商場都係一模一樣的商店,已經冇動力喺香港任何地方玩樂。」旅行是最大的玩樂。

旅行不只吃喝玩樂
對於阿貝而言,旅行不只是玩樂。「我係一個鍾意計劃行程的人,經過計劃,你才會更加愛上那個地方。」每個景點,她也會先了解背景,加深對旅程的感受和意義。

她和男朋友會將旅程剪輯成短片與讀者分享,「當係自己的回憶,又有條片,好有滿足感。」一條影片,阿貝花上足足一星期時間剪片、配音,當中她會加入很多交通或實用資訊,「想做有影響力嘅人,原來拍片係有人睇,有人會跟住條片去一次。」

「如果一出世就得到最好,你唔會珍惜最好。」雖然極愛日本,但是阿貝從未想過搬離香港,「旅行,是令我真正放假。」

撰文:黎雅婷
攝影:葉漢華
熱門新聞
  • 何雁詩強迫棄養 鄭俊弘用倒鈎鐵鏈綁狗 244,534 views
  • 鄭俊弘把口話狗仔好乖 為氹女友將愛犬送走 44,670 views
  • 鄭俊弘被雪零收入身材暴漲 買嘢搵何雁詩埋單 38,877 views
  • 【難忘舊仇】梁思浩拒做《百萬富翁》嘉賓 請主持陳志雲食檸檬 28,896 views
  • 【人神共憤】鄭俊弘用倒鈎鐵鏈綁狗 何雁詩網上回應:我是狗癡⋯唔係好明發生咩事 28,460 views
  • 多災多難 何雁詩戀鄭俊弘連阿爸都唔撐 26,986 views