< 返回
  • 【別人笑我太瘋癲】維園霆鋒走去揸的士 轉做正常人龍心:我係比較hyper(足本版)
  •   91,424 views │ 2018年08月08日
    留言()

 

「我係嚟自美國三藩市福青幫第二把交椅,龍心,438!」2012年一日的城市論壇上,蓄著一頭長髮、額頭劃上符號的林克霖在鏡頭前自稱黑幫成員,「一炮而紅」。事隔六年,已剪去長髮的他著記者不能以龍心為標題,說自己已不是龍心。

曾月入十萬

名字對他而言,或許只是一個稱呼。身份證上的名字轉了幾次,別稱更是多籮籮。昔日他自稱龍心、絕心、王小虎,現在他時而自稱猴子農,時而自稱「克霖醒」:「因為之前有人叫我『克霖頓』,咁我話『頓』唔係幾好,不如『克霖醒』,有啲創意。」他戴上藍色幼框頭箍,紮起小辮子,穿著背心短褲坐在的士內,握著方向盤,外表上沒有了昔日龍心的張狂。他非常著緊這次訪問。訪問期間主動建議拍攝角度、鏡頭,更在電話中準備了幾頁以英文寫的筆記。他多番強調,很希望可以塑造新形象找白領工作,更在訪問後要求在報導發布前先檢閱報導,記者以編採自主為由拒絕。

問他歲數,他笑著不肯直說:「我今年24,出年23。」按照他的畢業證書上的出生日期,他現時應是41歲。林克霖2007年在澳洲臥龍崗大學I.T.碩士畢業,曾從事I.T.行業相關工作十年。他展示當時進修的一疊文憑,MCSE、CCNA都有:「一疊文憑,真係可以貼牆紙。」十年前,他在香港的人工是五萬元。後來轉去英國做,人工翻倍,十萬八一個月。他目前投出了數十份CV,其中兩份有面試,其中一份還是政府工。他大賣廣告:「我而家大割價,以前十萬零八,而家三萬六。三分一價錢,你就可以請我,我就會幫你做到隻狗咁。」

>轉揸的士

除了六年前城市論壇一幕,龍心亦做過不少出位行為:網台節目中非禮、於六四集會自瀆。他說當年有打算找份I.T.的工作,但以當年的形象,沒有公司敢請他:「我知道喺辦公室、白領呢行,基本上已經封殺咗我。所以我為咗唔浪費時間,掙扎求存,我就去了建造業。」

不做龍心,做職安真漢子。他拿出卡簿,展示滿滿四頁的牌照:「呢堆都係建造業考到嘅中工牌、大工牌,亦考到釘模板牌。」雖然住在東涌八百多呎私人屋苑,他說目前亦要打幾份工靠勞力賺錢:「我主要嘅收入來源就係執房,要掃地、吸塵、洗廁所,有時揸的士,有時做木工散工、地盤散工。」

以前嗰個唔係我

他提出拍攝自己耍太極劍,還在耍劍前安排台詞給自己:「以前想改變世界,而家想改變自己。」當年出位,他說是想做救世主。出位前,他在外國多個國家工作,後來去了五、六年旅行,「返嚟後覺得自己有足夠能力,作為一個行為藝術家,想改變世界,見到好多唔公平嘅事情想改變,當然比較天真。」問他覺得以前做錯嗎,他想了想,答:「我唔可以話以前嗰條路線係錯,以前嗰個根本唔係我,我只不過製造咗佢出嚟。佢嘅思想、想法,都同我而家諗法唔同。我而家再睇返啲片,『有冇搞錯?咁都得?』我咁諗未必係啱,我咁睇,好可能係學咗香港人嘅生存模式、文化去批評龍心呢個人。」

當年行徑異於常人,網民懷疑他有精神病。他想了一會,說得玄妙:「其實精神病個個都有,只睇係咪發作出嚟,有啲人發作咗,他變咗一個好循規蹈矩嘅香港人,佢哋嘅反應可能好奇怪,但佢符合呢個社會。」他又說:「根本而家啲人都唔正常、唔自然。笑都唔自然,開心都唔開心。」

他談起自己經歷:「屋企人可以好唔尊重佢哋嘅小朋友,捉佢入精神病院。如果小朋友俾屋企人咁對待,要即刻斷絕關係。」穿著西裝,坐在電視櫃上,他收起笑容,舉起食指看著鏡頭:「我係一個孤兒,我冇親人,我亦唔需要有任何親人。我而家嘅狀態我唔需要有任何人去關心、明白我。因為我堅決靠我自己一個喺呢個社會生存。」

天才定白痴?

記者再問更多關於他在精神病院的經歷,他不肯多說,拿起家中放在窗台的黑板,讀起上面的句子:「Be prepared,look forward,not not forward」為甚麼不用Backward?他說因為句子是給潛意識看,希望潛意識只看到「forward」。他續說:「我唔覺得我係一個精神病人,我只不過反映出呢個社會對少數人士 或者一啲小問題將佢化大。我只不過將自己入去嗰個角色,親歷其境、親受其害,體會呢件事。」

他說曾經找醫生做過一個精神測試,做完自己再研究後測試,得出結論:「我係唔屬於maniac(狂躁)或者Hypomanic(輕度狂躁),我係差唔多,我係比較hyper少少,仲喺正常範圍。」他說當時醫生認同他的說法,「醫生話係,你最好正常啲,搵份工。吓?咁就正常?」醫生說他基本上是個天才。他略帶激動:「天才當我白痴咁看待?」。他訪問中曾說,覺得自己根本是外星人,訪問數天後再緊張地錄音跟記者說,不想提太多以往錯誤的事,現在只想做一個地球人。

撰文:鄭靖而

攝影:攝影組

立即下載《壹週刊》Apps,隨時隨地睇盡時政專題、深度偵查、娛樂熱話!

按此連結: http://bit.ly/next28app
熱門新聞
  • 【港版TFBOYS ? 】《全民造星》Mr.Jan 童顏搶晒鏡 劉美君話唔做戲嘥晒! 102,753 views
  • 【每日壹爆●銀城吸煙惡女】直擊店員商場內狂煲煙 被指阻塞通道即鬧爆保安(足本版) 79,075 views
  • 【經典●張栢芝接江湖姦殺令】吳雪雯唔接戲被圍毆 蔡慧敏被禁錮72小時 (足本版) 67,969 views
  • 【每日壹爆●青龍教秘中秘】億萬富婆為賣淫集團煮飯 高級督察揭她是誰......(足本版) 66,738 views
  • 【赤裸的女人】34歲天體港女:著衫好束縛唔舒服(足本版) 55,534 views
  • 【冇何傲兒繼續爺孫戀】八十歲林建名認食藥 拖日系少女睇Hello Kitty (足本版) 53,393 views