< 返回
  • $5000一條人命
    民建聯被批涼薄
  •   37,330 views │ 2017年03月21日
    留言()

 

經常有地區活動兼搞蛇齋餅糉嘅民建聯,有不少街坊義工;不過,一位義工家屬阿May,就喊住同《壹》仔講,話佢爸爸上個月過身,原因係幫民建聯嘅吳奮金做義工,但其間發生意外撞到後腦,結果醫咗九個月,最終不治。

阿May話,佢爸爸七十幾歲,晌愛民邨做咗十幾廿年義工,成日幫手搬搬抬抬,試過區議會選舉時幫吳奮金助選,天未光一個人掛晒全條邨嘅Banner;又試過嗌咪嗌到聲都爛埋,三日出唔到聲。

去年六月,吳奮金喺愛民邨會堂協辦電影會,佢阿爸到場幫手收拾物資,點知喺斜路跌親,後腦著地送院。由於腦部傷勢嚴重,再加上年紀大,令佢失去自理能力,身體亦出現併發症,今年二月中過身。

阿May話,爸爸係自願去做義工,但估唔到吳奮金咁無人情味同涼薄,由出事到死亡,乜都話「唔知、唔關我事」,無解釋過意外原因之餘,甚至想同事件畫清界線。「佢初初仲話俾我聽,話阿爸係喺呢度跳咗落嚟(跳樓)。」

爸爸出事之後,阿May曾經向吳奮金求助。「就好似叫佢幫手搵安老院,都係求其上網print啲名單叫我哋自己搵。」

《壹》仔搵過吳奮金,佢就不斷解釋話自己已經盡晒力,又話曾幫手要求社署協助,仲話出事後一直協助家屬,幫佢哋申請民建聯愛心基金,仲拎到五千蚊恩恤;仲話晌佢落力爭取下,保險公司都俾咗五千蚊賠償喎。真係多謝晒!

撰文:陳明慧
攝錄:傅俊偉
熱門新聞
  • 【警疑濫權溝女】男警查ID「抄牌」 凌晨WhatsApp問有冇男友 77,024 views
  • 【800呎泰國新居曝光】二按香港物業套現 羅敏莊:香港啲樓太貴 65,063 views
  • 想陳禛入讀曼谷哈羅 羅敏莊參觀校園驚嘆:有個湖呀! 43,329 views
  • 【國際學校的現實】中文水皮睇唔明《射雕》 ischool畢業生怕搵政府工 36,156 views
  • 【不滿賣得太便宜】獨家錄音揭斑馬牌受壓 停向良心雜貨店供貨 34,852 views
  • 【獨家●錫到個囡燶】陳國邦300萬買泰國樓方便阿女當地升學 陪玩半跪扮櫈俾陳禛坐 33,631 views