< 返回
  • 【虐囚黑幕】少年釋囚爆料:阿Sir踢爆囚犯睪丸 掐下體取笑唔係男人
  •   25,412 views │ 2017年09月07日
    留言()

 

銀幕上的監獄世界,四周總是昏昏暗暗,然後有班魔鬼教官在瘋狂欺壓囚犯們。真實的牢獄世界又如何?

兩名少年釋囚向本刊投訴被懲教人員長期虐待,輕則遭對講機扑頭、被灌水飲到嘔;重則以麻包袋吊起毆打、遭言語恐嚇「踢你落山」、被掐下體取笑「唔係男人」、更有阿Sir疑玩「射龍門」不小心踢爆囚犯睪丸。

懲教署提倡「懲」與「教」並重,現實似乎是「懲」而不「教」。數十名釋囚先後向傳媒爆料指被嚴重虐打,懲教工會卻說聞所未聞,太平紳士巡視監倉也是零投訴成立。

但有現職懲教人員向本刊承認,少年犯被「打到飛起」,因「老一輩(同事)慣咗打犯」才能控制場面,「啲犯先識聽話」。

監獄對很多人來說,是個神秘的地方,外界看不見裡面的情況。

但若你還記得,八年前一名台灣籍囚犯還押時,遭三名懲教人員毆打後倒斃囚室,三人終被判監十六個月。

空穴來風,當少年犯被虐待成為習慣,他們獲釋後還怎能重新做人。

撰文:李啟發
攝影:石鎬鳴 傅俊偉

「總言之你入到去就係另一個世界,唔係你所想咁有嘢學,入到去你就知咩叫黑暗。」二十九歲從事運輸業的阿細(化名),在曾經生活兩年半的歌連臣角懲教所附近公園憶述往事,之所以在附近受訪,因他擔心一旦行近歌連臣角,會遭懲教人員「點相」報復。

「入到去要好似狗咁聽阿Sir話」

十五歲那年,阿細離家出走,干犯多宗盜竊案,被判入教導所後,幾乎每天面對懲教人員虐待。問他究竟有無好人的阿Sir,他沒多想便答:「你唔好諗住裡面會有關懷,好嘅最多咪食煙,食完一半掉落地,你自己(拾起來)chur。」

【虐囚黑幕】少年釋囚:阿Sir掐下體取笑 「射龍門」踢爆睪丸
http://bit.ly/2f2B89b

入獄前,他在法庭遇見一名釋囚「師兄」,向他預告:「入到去只要好似狗咁聽阿Sir話,就未必有咁重刑罰。」結果第一日入監倉,他就明白何謂失去尊嚴,囚友們被帶進保安房,「要我哋踎低,繞起雙手,好似隻兔仔咁,問有冇跟人,答有就一巴摑你。」

這只是開始,往後更遭受長期身體虐待,「你乜都要嗌Yes Sir,要大聲嗌,嗌到冇氣都要嗌,唔滿意就打,一係『雞翼』(手踭批背脊),一係『芥蘭』(膝撞大腿)」,有時要「食了結糖」,即抬頭讓阿Sir用「手刀鑿喉嚨」。

「射龍門」踢爆睪丸 性虐掐下體
阿Sir打人可以無原因,當囚友犯錯,就有其他體罰,例如「殺板」(打手掌或腳掌),「值日官房有三塊版,實心木板、水晶板、鐵板俾你揀 我衰清潔,手板被打到紫色,血管爆曬咁濟」。他曾聽說一名叫「權哥」的阿Sir,命令囚友擺好姿勢讓他「射龍門(踢雞心)」,「唔知係咪玩得過份得濟,唔小心踢爆咗睪丸。」

現時擁有健身教練身型的阿細說:「嗰時我好孱,有啲阿Sir會搞我,喺新人組時掐我下面(性器官),之後叫帶廚房嘅(另一名)阿Sir去廁所睇我,又掐我下面,我覺得好侮辱,男人點解要俾你掐?」

三名阿Sir曾在廁所或通道上掐他下體,「有次喺指模房又掐,然後問『你係咪男人嚟㗎?』」囚友見到都不敢出聲,他亦不敢躲開,「縮咪俾佢打,惟有企喺度等佢掐」。阿細強調每次都沒犯事,對方純粹玩弄他,至今難以釋懷,「可能呢啲就叫『記憶』」。

言語虐待更令他驚恐,曾有阿Sir跟他說:「呢度好難受㗎喇,你拎個垃圾桶,我開個大閘俾你,你行出去。」然後補充:「你走出去我踢你落山崖,真嘅,如果你死咗,最多話你較腳,走佬跌落山崖。」他覺得對方「根本想玩我哋,你行得出去,一係打跛我,或者推我落山崖,我點解要受咁嘅屈辱?」

沙咀四傻 麻包袋吊起毆打

令他印象深刻的,還有由沙咀勞教中心調來的四名懲教助理,人稱「沙咀四傻」,「佢哋巡倉踢竇,會推冧或者反晒你啲床板,揚散晒撈亂曬你『綠箱』(放置囚友家當)啲嘢,睇到冇嘢就走。」

四傻各有所好,「李Sir會逼你食蒜頭,等你喉嚨好辣呀咁樣」、「家樂就會請你食雞翼,飛天嗰隻,跳起bomb一聲中你尾龍骨,係好痛。」有些阿Sir喜歡逼人飲水,「你飲完基本會嘔,係咁嘔返啲水出嚟,或者你食過嘅嘢。」

另一次,有囚友罵了阿Sir一句,就在飯堂遭阿Sir用麻包袋紮起,「飯堂有個勾架嘛,就吊喺上面打 其他學童就伏低,冇得你睇 總之你喺裡面做錯一定被人打,你預咗有個必死心態。」

「可能佢眼中打你就係教你,正如佢哋口頭禪係『無刺激、無記憶』,愈痛就愈有記憶,下次唔好犯,但有冇諗過人哋唔想被你打?冇人想喺裡面,更加冇人想喺裡面被虐待。」阿細眼中,監獄無人權,只有越權。

另一監倉相似經歷

釋囚阿水(化名)小學六年級便因藏毒品「K仔」需接受警司警誡,之後跟人打架又加入黑社會,案底累累。數年前出獄後改過,現為朋輩輔導員,感化邊青。

他憶述,第一日入壁屋監獄便遭毆打,「收新人時,都會問你邊度㗎,即係咩社團,我話老新(新義安),佢就一巴打過嚟,話咩叫老新,我唔識喎。」

新人第一日去飯堂,都要先踎在阿sir面前,背誦數條監獄規則,背錯便會被踢或灌飲水,「依家個年代個個食K仔,係咁索K,膀胱細就緊㗎啦,其實真係好快想去廁所,冇得去咪瀨囉,瀨咪被人打囉。」

「得監房制度五十年不變」
他試過朝早弄濕頭、摺毯摺不到起角,就被棍打腳板底,「隻腳痺曬,不停震,打完仲要你即刻跳,嗰吓感覺好似踩住舊釘。」 有時囚犯沖涼,阿sir在戶外曬著等,遇著脾氣差的,只得三十秒沖涼,「除衫都用十秒,梘都唔使摔喇,要即刻沖一沖水就衝返出嚟列好隊」,最遲出來的兩人就會被打。

阿水曾目睹有囚友被罵不服氣,怒睥阿sir,被拖入無閉路電視的廚房內打,「仲有皇法嘅?(事後)聽講入咗醫院。」阿水跟阿細同樣指獄中人身安全沒保障兼投訴無門,無人敢向太平紳士投訴,「估唔到入到去受罰緊,仲要承受額外嘅苦。」

他強調:「如果你講咗(被人打),屋企人喺出面一路投訴,你就喺入面一路俾人打,日子仲難捱。」這些虐囚情況至今一樣,「得監房制度係五十年不變」,他的兄弟出入監房「都係講返咁(嘅遭遇),(監獄)叫文明咗,可能係設施,圖書館嗰啲。」

懲教署回應稱,非常注重職員操守,若証實有任何違紀行為,將紀律處分,呼籲投訴人主動聯絡署方或其他執法部門以作調查。

劉慧卿促設獨立部門巡監獄

根據九九年至前年的太平紳士巡視年報,在囚人士向太平紳士投訴懲教署個案,全部不成立,即從沒成功投訴例子,懲教工會代表亦指無見過或聽聞過虐囚事件。

當了太平紳士愈二十年的前立法會議員劉慧卿指出,沒成功投訴例子「令人好震驚」。她多年來巡視監獄,在囚人士一般投訴飲食或其他問題,「有時就係話有蚊呀、好熱呀,或者唔夠通風呀都有」,但被虐打投訴她一次都無遇過。

對於大批釋囚向傳媒投訴,她形容事件「好嚴重」,反映「制度有問題」,建議仿傚英國設獨立部門,由受訓專業人士負責巡查監獄,惟現階段未見政府有意設立類似部門,「香港政府好明顯冇興趣咁搞。」

最近有社工懺悔,指曾忽略少年犯在獄中的「辛苦」經歷,以為「坐監就係咁」而忽視細節。現實是被虐少年犯出獄後,見到間尺也「想縮」、上班途中經過監獄,都感害怕,至今仍發噩夢。到底監倉的上空,何時才會有藍天。

表:十二大虐囚酷刑

雞翼:懲教人員手踭批少年犯背脊,進化版是「飛天雞翼」,跳起身踭背脊。

芥蘭:少年犯遭膝撞及用腳踢大腿外側,會感非常麻痹。

大找:操體能數小時,再加兔仔跳及百步梯,有哮喘少年犯病發用哮喘泵,也要繼續操。

對講機扑頭:扑完腫了,懲教人員會問「你精唔精神」,不精神便再扑過。

殺板:值日官房有實心木板、水晶板及鐵板三塊版,少年犯要自選用哪種板被打手或腳掌,打到手板爆血管。

言語恐嚇:懲教人員向少年犯表示開門讓他離去,但恐嚇「你走出去我踢你落山涯,你死咗,最多話你較腳失足。」

射龍門:擺好動作讓懲教人員踢雞心,有傳曾有少年犯被踢爆睪丸。

灌水:被逼飲水飲到嘔

了結糖:抬頭讓阿Sir用「手刀劈喉」。

快車:腳板被棍棍連續狂打後,立即起身步操。

麻包袋吊起毆打:用飯堂廚房裝大包米的麻包袋,吊起少年犯毆打。

三手房會面:有少年犯向家人投訴被打,之後被召入保安房,出來後不敢再投訴,疑遭言語恐嚇。

資料來源:綜合兩名投訴人
壁屋監獄每天早上會播放一段聲帶,用來叫醒在囚人士。阿水於放監後一段時間,每天早上仍會驚醒,「一彈起身就會聽到啲聲」,想起被虐打的情形。
阿細去到哥連臣角懲教所附近公園憶述往事,還擔心會遭懲教人員報復。外人看來是多疑,對他來說是發自內心的壓力。
一級懲教助理梁盛志(加)、懲教主任蘇嘉瑋(中)及高級懲教主任鄧旭波(左)因嚴重傷人罪成,被判監十六個月。法官判刑時曾指出,「懲教署一個咁密封嘅地方,公眾根本冇辦法監管。」蘋果日報圖片
台灣籍囚犯陳竹男○九年因行騙被捕,還押荔枝角收押所,三日後早上候診時擅闖診症室,遭懲教人員制服及毆打,翌日朝倒斃囚室。倒斃前數小時,他在保護室內行為怪異,曾脫光衣服伏地,右邊大腿瘀痕清晰可見。
三名涉案懲教人員曾押解陳竹男到保護室。
劉慧卿形容虐囚事件「好嚴重」,促港府仿傚英國,設獨立部門並由專業人士負責巡查監獄。蘋果日報圖片
懲教署提倡要「懲」與「教」並重,但一班釋囚指控長期遭受懲教人員虐待。蘋果日報圖片
熱門新聞
  • 李明蔚經歷42次電療化療 馬浚偉助出碟圓心願 47,385 views
  • 【舊區淪陷】大陸旅客逼爆街 街坊:十年嚟無覺好瞓! 42,326 views
  • 對住老公皺晒眉 47歲陳慧珊面色枯黃keep唔到 41,344 views
  • 【台慶唔戒奶】邵佩詩八字波最夠薑 陳凱琳最露骨 37,836 views
  • 【遇到好人的士佬】陳少霞左巨鑽右珍珠 伸一伸手貴過人 36,261 views
  • 【豪語錄】從黎明中學習!樂基兒:唔怕受傷害 35,859 views