< 返回
  • 【八卦陣】工聯會區議員 冇申請照打齋
  •   11,018 views │ 2017年09月08日
    留言()

 

農曆七月鬼門關大開,周圍都搞盂蘭勝會,之前「帕卡」吹襲香港,《壹》仔就發現將軍澳尚德邨有人喺八號風球下仲打齋,而且冇事先申請。房署話原則上唔准許呢個活動,但有份搞活動嘅工聯會區議員簡兆祺,竟然話房署多年來默許,仲批評有人搞政治攻擊,真係咁都得?

當日朝早《壹》仔去到現場,發現尚明樓停車場對出已經搭好棚,晏晝八號風球都未除下,就開始打鑼打鼓吹「啲打」,又有道士誦經。尚廉樓出入口附近嘅機房同垃圾房都打開咗,有電線由機房拉去壇附近嘅射燈度。

至於擺放燒豬、香燭等物品嘅枱,就有個帳幕擋雨,帳幕寫住嚟自當區工聯會區議員簡兆祺辦事處嘅字眼。樂隊到約五點暫停奏樂,但到夜晚近七點繼續。上星期三《壹》仔番去現場,所有棚已經被拆走。

尚德邨搞咗五屆盂蘭勝會,據悉因為邨內自殺案多,有人希望打齋超渡亡魂。房屋署回覆話,搞盂蘭勝會嘅位置唔係舉辦活動嘅場地,根據房委會指引,團體搞活動前七個工作天,要遞交申請俾所屬嘅屋邨辦事處,但過去五年都冇收到申請。簡兆祺就話係房署默許,反而批評有人利用今次活動搞政治攻擊喎。

撰文:巫不言
當日下晝不停落雨,不過無阻尚德邨舉行盂蘭勝會,仲有道士誦經。
當日亦不時有街坊上香。
簡兆祺反而批評,有人利用今次活動搞政治攻擊。
熱門新聞
  • 【貨Van界女神】索過「跟車羅拉」美女轉行揸貨Van送貨月入4萬(足本版) 118,967 views
  • 【開片後的黑幫宴】勝和雞腳黑高調擺壽酒 艾威吳國敬現身密斟(足本版) 78,108 views
  • 【壹經典●四叔感情】前妻選美出身 四叔離婚後癡戀不再婚(足本版) 51,641 views
  • 【壹經典●四叔感情】李兆基前妻消失23年後 大型法會神秘現身(足本版) 41,789 views
  • 【好大方●被余安安介入?】陳煒與監製男友分手 繼續孖住開公司 (足本版) 40,158 views
  • 【慳自己唔慳司機】陳煒月慳5萬搬新竇 堅持請司機七人車接送 (足本版) 36,540 views