< 返回
  • 【17歲的畢業禮】最年輕常委接之鋒、羅冠聰捧 鄭家朗在鐵窗外走一條新路
  •   11,541 views │ 2017年09月26日
    留言()

 

十七歲的畢業禮 鄭家朗

雙學三子入獄後兩星期,十七歲的鄭家朗迎來了他的首戰。他和黃莉莉二人在狹窄又充滿雜物的眾志工廈總部,主持首個記者會,批評教育局制訂的通識科教材染紅。忽然要擔大旗,家朗話只係「形勢所迫」:「佢哋走咗入去,都要有人補位,我就頂替咗上去。」

當年那場由學民思潮發起,超過十二萬人參與的運動,是不少年輕人的起點,家朗是其中之一。洗腦教育再度借屍還魂,迎起抵抗的依舊是最年輕、充滿稚氣的面孔,時光彷彿倒流到五年前的反國教運動,只是台上初試啼聲的家朗沒有像之鋒一樣,初出茅廬就鋒芒畢露:「佢哋成日都講到啲sound bite俾記者去quote,又或者好簡潔咁表達到,記者好容易寫。我比較悶,有啲緊張,變咗好多時都係照稿讀。」

家朗的父母比較親建制派,他小學時又經常參加工聯會活動,幫手做義工:「成日接觸工聯會嘅觀點。有咩事發生,會知『大家』認為係咁睇,大家係指工聯會或者爹哋、媽咪,變咗同佢哋同樣睇法。」一○年,曾蔭權和余若薇就政改方案進行辯論,還是小學生的家朗亦跟父母一同觀看:「嗰時我喺電視機前面鬧爆余若薇,話佢賣港、賣國賊咁樣,有種瘋狂式嘅民粹喺入面,即係你唔會有理據去反對,但就係知道我要憎佢、我要鬧佢。」

升中之後,碰上反國教運動的高峰,通識科老師在堂上講解黃之鋒誓死要撤的國民教育到底是怎樣的一回事,家朗才醒覺多年來為鬧而鬧的原因:「原來建制派或者工聯會其實講少好多嘢俾我聽。好多嘢係呃咗我哋。」

當時家朗未有走上街頭,但種子一萌芽就回不了頭。一四年初,家朗和一班朋友柴娃娃組成「搏打製作」做YouTuber,雖然短片充滿爛gag,製作又略嫌山寨,view數慘不忍睹,但主題總是圍繞着環保、貧窮、棄養動物等貼地的社會議題。到雨傘運動爆發,家朗第一次參與到社會運動之中,與同學一起發起罷課:「我好記得,928嗰日係星期日,嗰晚媽咪帶我哋去祈禱會。但過程中我不斷篤手機去聯絡啲人,去搞星期一個罷課。媽咪都知我想做啲嘢㗎喇,好大反應咁話:『你唔好返到去搞搞震喇!』但嗰時我係好堅決去做呢件事。」

接棒

香港眾志在去年四月成立,家朗第一時間報名做義工,協助羅冠聰的立法會競選活動。選舉完結後,獲黃之鋒邀請入黨,成為最年輕的眾志常委。「當我認為一件事啱就會做,一做就係好瘋狂。暑假大家瘋狂補習,我就不斷搞街站。」他幾乎連DSE都擺埋一邊,到剩下一個月時間才開始埋頭苦幹。考完最後一科當晚,又立即趕去眾志的黨慶派對。反而七月中學謝師宴,差啲連一套見得人嘅衫都冇:「嗰日我喺立法會做緊嘢,四點先發覺唔對路,我六點Grad Din,冇理由著住便服走入去㗎嘛。黨友就即刻同我一齊去買衫揀衫。」現時鄭家朗在樹仁就讀社會學系。

緊接着畢業,隨即就要面對社會的殘酷:七月底,羅冠聰的議員席位被DQ,然後戰友更逐一被政權迫害入獄,對家朗造成好大打擊:「其實嗰幾日我唔係好處理到自己嘅情緒,我唔明白,點解仲有咁多聲音去攻擊佢哋。同佢哋相處都有一年啦,見到旁邊認識嘅人,走咗入監獄,去承受緊一啲嘢嘅時候,你會覺得好唔舒服。」他更曾擔心自己無法好好接手戰友們的工作:「始終我唔係入咗嚟好耐,處事成熟度冇佢哋咁高。佢哋每一件事,每一個行動,都好深思熟慮。到我接住,我唔知點去處理一啲關係,點樣去諗啲行動,個議題點樣行落去。因為好多人望住我,究竟未來點樣做。」

羅冠聰和黃之鋒入獄前一晚,眾志全體聚餐。席間羅冠聰捉住家朗話:「你喺出面好好努力啊,我哋喺入面做唔到啲乜嘢!」

「其實我好驚自己接唔住你哋支棒。」

「你唔使接住我哋支棒,你哋自己行一條新嘅路出嚟啦。」這刻,十七歲的他總算明白了。

訪問一完結,攝影師還在拍攝凌亂的眾志辦公室之時,家朗已經即刻拎起手機,一時send voice message 處理黨務,一時又打電話約電台訪問時間,忙個不停,配上他的齊蔭髮型,與印象中的黃之鋒,確有點相似。

撰文:關冠麒
攝錄:葉漢華
熱門新聞
  • 【開心速遞隻鬼冇咗】不甘俾大台玩 顧紀筠兒子冇癮解約 57,948 views
  • 【大台性女】 馮盈盈當街吸啜咀男友面珠登 43,004 views
  • 【中環人語•天空龍吟】大媽伸手入褲袋 日本師傅滴淚 41,977 views
  • 懷孕甘比面容飽滿 拖實精神大劉出席酒會 38,036 views
  • 【中環人語●無陰功】每張單平均得40幾蚊 759林偉駿:搞優惠賺多幾蚊 37,609 views
  • 【胸前晃不停】何超蓮素顏跑街 37,195 views