< 返回
  • 【佔旺藐視法庭】情迷國際歌 社記關兆宏的理想世界
  •   9,154 views │ 2017年11月05日
    留言()

 

自畢業後,關兆宏全力投身社運,「當阿毛(長毛梁國雄)入獄嘅時候,就有好強嘅感覺,其實我哋都有份(衝擊替補機制論壇),我哋要孭。」每次走在最前線,他就像在「還債」。

他先加入左翼21,後來「轉會」社民連,「你見到另一個重要嘅地方,或者要點,開始失守,咁不如就去嗰邊幫手啦。」

關兆宏本來是長毛的議助,長毛被DQ後,他就以平面設計和攝影等工作維生。去年他成為社民連副秘書長,「作為一個政團,佢嘅核心架構都可能行咗七至八年,甚至十年嘅時候,都需要換吓啲新血上去。」他偷笑:「咁啱唔知點解係我。都係名嚟啫,是但啦。總之你孭咗個名,背後嗰啲責任你就要幫手處理。」例如恒常會務和職員系統。

「棺材」是社民連示威的重要道具之一,但今年七一遊行,紙棺材出師未捷,未運送到灣仔,在長沙灣總部樓下已被十多名「暴徒」摧毀,社民連成員亦被毆打。
事發前,關兆宏早被跟蹤,七一遊行前一晚,三名「大漢」由社民連辦公室尾隨他到寓所,之後在門外「駐守」,「佢要打或者點好,就唔會俾你有準備。」翌日出門時,不見三名大漢蹤影,最後翻查片段,認出三人有份摧毀棺材。

沒資格去放棄
他和朋友合租一個三房唐樓單位,還經常會有朋友帶兩隻唐狗上來過夜,是真正的「共居」。室友兼黨友劉國樑早他一步入獄,家中少了一個人,客廳擺設依然不變,仍掛起那紅底白字的《國際歌》,他說是四年前碼頭工潮的「遺物」,輾轉落入他手中。

「這是最後的鬥爭,團結起來到明天,英特納雄耐爾就一定要實現!」

「我覺得『最後嘅鬥爭』,係對權力不斷反思,無論你贏定輸,其實你都要諗。甚至我哋嘅中國,共產黨得勝,但到最後,你可以話佢違背咗左翼嘅思想,變咗做依家一個極邪惡嘅政權,說穿了都係因為權力。」但是他又說,權力不一定是負面,「但係點樣正面我都唔肯定,我估全部人都探討緊。」

命運自主和港獨呼聲,在香港愈演愈烈。這名九十後呆望手上的捲煙,倒吸一口氣,然後說自己追求的政治理想,是「香港同內地嘅民運,可以結合同埋串連。」藉此令共產黨作出妥協。

被問到是否真的有可能結合兩地運動,他卻又承認:「係呀,做唔到㗎。係做唔到。」

不過李旺陽被自殺、劉曉波之死、劉霞被軟禁和內地眾多民運人士受到的打壓,使他不時自省,「真係仲有啲人係好努力去做,甚至努力做到佢已經唔喺度。咁你會問自己,×(粗口)!我有冇資格去放棄呢?」

「我依然好鍾意社會運動」
「人 我覺得係可以共處,我覺得係可以不論膚色、不論文化、不論歷史背景,到最後都可以共存,我覺得呢個就係所謂嘅理想世界。」

他堅持不懈,也因為經歷了雨傘運動。

「係海量嘅人,大家都唔認識,但係大家會互相照顧,無論係衝擊,又或者係好簡單,問你有冇食早餐。」

「大家唔識,但係為咗同一個理念去做一啲嘢,或者傾偈,或者交流,嗰啲唔係人性嘅光輝咩?人類嘅社會,唔係應該係咁㗎咩?」
「所以我依然都係 好鍾意社會運動。」

相關連結:

【佔旺藐視法庭】唔怕亡黨預咗坐監 關兆宏:運動唔可以消失

http://bit.ly/2A3kCOb
熱門新聞
  • 李明蔚經歷42次電療化療 馬浚偉助出碟圓心願 46,162 views
  • 【舊區淪陷】大陸旅客逼爆街 街坊:十年嚟無覺好瞓! 42,091 views
  • 對住老公皺晒眉 47歲陳慧珊面色枯黃keep唔到 40,891 views
  • 【醫生與您】薄血藥與通波仔的迷思 38,931 views
  • 【遇到好人的士佬】陳少霞左巨鑽右珍珠 伸一伸手貴過人 35,888 views
  • 【豪語錄】從黎明中學習!樂基兒:唔怕受傷害 35,538 views