< 返回
  • 【情陷夜中環】蜘蛛合(葉朗程)
  •   28,996 views │ 2017年11月15日
    留言()

 

講到兩性關係,女人的確比男人有深度啲,所以男人整出嚟嘅「Tinder」幾乎被淘汰,取而代之係由女人整出嚟嘅「Coffee Meets Bagel」。如果你同我一樣,兩個apps都玩過,相信你亦都會同我一樣,玩過Coffee Meets Bagel之後,就唔會再想玩Tinder。

當然,Coffee Meets Bagel都唔係新玩意,但當你臨近聖誕卻依然好似我咁,係一條單身嘅可憐蟲,我諗你都會同我一樣,唔理係新玩意定舊玩意,總之交到「朋友」嘅,就係好玩意。何況Coffee Meets Bagel這個「新玩意」,最近就搞搞新意思,大概一星期前開始俾人擺videos上去,仲要每日都有一個唔同嘅theme,例如啱啱嗰個theme係spin around and show us where you working at。

假若你都係玩呢個app玩到咁貼,你都應該會留意到,真係會拍段片上載嘅嗰啲女仔,十個有十一個都係朱東同朱南個妹咁嘅樣。講真,玩得Coffee Meets Bagel嗰啲,通常都會懶係唔係成日玩,懶係志在同朋友多啲共同話題,又懶係得閒冇嘢做先開個app出嚟㩒吓,邊會有人真係咁戇居拍段片上去呢?

不過真係世事難料,啱啱喺個app見到一個好有heart嘅超高質女優,真係咁搞笑自己拍咗段片上去。點解話佢有heart呢,因為佢連制服誘惑都玩埋,著住成件醫生袍喺度扮專業人士,仲要有埋聽筒做道具,你話有heart唔有heart?佢個名叫做Carmen,而我見呢位Carmen咁肯花心機整靚個profile,我當然要俾啲鼓勵like咗佢。隔咗冇幾耐,佢已經like番我轉頭。

我當然冇飄飄然啦,好似Carmen呢啲咁kinky嘅女仔,應該都係秉持住寧濫勿缺嘅宗旨,係男仔都會like。大家connect咗之後,九秒九速度就開始對話。好似我呢啲老手,已經玩到係form到一個pattern出嚟。首先我會問佢「做緊乜」,然後佢答完之後又會問番我做緊乜,跟住我就會話「同隻狗玩緊」,如無意外佢就會問我「係咩狗」,我就會順理成章send我同隻狗玩緊嘅相俾佢,睇完張相佢就會話oh my god your dog is so cute,最後我就會話haha don't you think I am cuter than my dog。一去到呢個flirting stage,餘下落嚟嘅發展應該都係一條大直路。點知

做緊乜?「攤咗喺梳化,你呢?」同隻狗玩緊。「哦。」大件事,佢呢吓「哦」殺了我一個措手不及,我本來諗住send張狗相俾佢,而家咁嘅情況,惟有再諗話題。你做邊行?「你真係想知?」好想知。「我喺淘寶賣sex toys同埋制服。」Wow,其實一睇佢個look應該都會估到,啲頭髮又啡又金,仲要戴埋灰色隱形眼鏡,佢一定係一個好前衞嘅女仔。

有冇啲咩制服啱我?「你鍾意咩制服?」有冇蜘蛛俠?我好鍾意蜘蛛俠。「蜘蛛俠就冇喇,蜘蛛精你啱唔啱?」嘩,呢句真係挑逗到出面;盛情難卻,葉某惟有跟住佢節奏。蜘蛛精嗰套,應該你著啱啲喎,唔知我有冇榮幸搵日睇吓呢?「來日方長,總有機會。」呢個機會,有冇機會,喺下個禮拜出現?「都得喎。」不如WhatsApp傾?「你有冇WeChat?」睇到呢度,見佢用WeChat唔用WhatsApp,你千祈唔好以為佢係大陸人。十個有八個玩呢個app嘅女仔,都鍾意交換WeChat,好少直接WhatsApp,原因好簡單,WhatsApp即係要俾私人電話,WeChat唔使,女仔識保護自己係好事。

本來約呢種級數嘅女仔,求其揀間餐廳已經好足夠,不過我一向鍾意獅子撲兔,所以我提議食一間米芝蓮二星嘅餐廳。怎料,她問我可不可以選另一個地方。點解?「喺嗰啲地方食飯,揸住刀叉你切吓嘢我切吓嘢咁,好拘謹啫。」我心諗,佢又講得好似幾有道理,於是我揀咗氣氛勁chill嘅Aberdeen Street Social。

仲記得,佢行入嚟餐廳嗰陣,好幾枱男士都眼定定由頭望到佢落腳。我同其他麻甩佬唔同,欣賞女人,我鍾意由對腳開始。Carmen著住一對米色高踭鞋,條白色裙高過膝頭三吋,布料莊重得嚟又帶少少飄逸,七分純潔,三分妖艷。

呢套就係蜘蛛精?「係呀,得唔得呀?」好得,我諗呢套衫喺你個online store應該幾好賣。「Yes and no啦。」點解呀?「啲客買完都要refund,因為佢哋發覺自己carry唔到。」我忍不住大笑起來。想不到彼此的世界那麼遠,談起來的節奏卻是這麼近。想起她那件醫生袍,我諷刺地叫了這裡出名的一杯cocktail給她,這杯cocktail的名字是「What The Doctor Ordered」。由這杯cocktail開始,我們談了無數的話題,包括大家喜歡的電影、世界末日前最想做的事、彼此的偶像。除了那杯What The Doctor Ordered,我們再試了很多杯招牌特飲。

第二天醒來的時候,我在香格里拉。她不見了,只是留下了一張字條,寫着Thank you for the night,旁邊還有她的手機號碼。再仔細一看,我開始覺得有點不尋常。簡單五個英文字,寫得這樣端莊秀麗,竟然會在淘寶賣sex toys?

我疑惑地拿起手機,按下她留下來的電話號碼。電話響了很久,仍然沒有人接聽,最後聽到一下線路轉駁的停頓,應該是電話給飛線了。正以為是飛去留言信箱,打算掛上電話之際,有人接聽了,未等我開口已經說了六個字,讓我呆了半分鐘。

「方醫生醫務所。」
熱門新聞
  • 【大開殺戒】涉追數官司 張繼聰遭TVB全面封殺 136,352 views
  • 【台慶唔戒奶】邵佩詩八字波最夠薑 陳凱琳最露骨 45,928 views
  • 【獨家】何志平美國被捕當日 胡慧中金鐘神情凝重收短信 41,329 views
  • 【自由身上ViuTV變死罪】大台說拍《包青天》 陳國邦臨門被飛 40,442 views
  • 【試晒造型影埋年曆】陳國邦損失慘重 請假推jobs後被方丈翹起 40,365 views
  • 【繞場壹週EP12.1】見陳茵媺擘髀甩骹 周家蔚輸得心服 39,893 views