< 返回
  • 【封面●獨家●五億探長呂樂】集團親信爆真相 : 重慶大廈收片大本營
  •   56,373 views │ 2017年11月29日
    留言()

 

影射呂樂一生的電影《五億探長雷洛傳》,替主角雷洛「收片」(非法勾當收取保護費)的「豬油仔」,現實生活中真有其人。黑幫14K出身的豬油仔與胞弟「沙皮狗」,為呂樂利益集團的核心,沙皮狗原來在重慶大廈設立「辦事總部」。

本刊找到曾替沙皮狗管數的親信,對於重慶大廈種種疑團,他說:「當年油尖旺有沙皮狗喺度,邊個夠膽同佢鬥?」

「差館都同我哋一條路,(警察)收兩份人工。政府一份,沙皮狗出一份。其實係呂樂俾權沙皮狗,香港、九龍(收)好多錢呀!交咗錢之後,十蚊佢(呂樂)就攞六、七蚊。」

親信斷言只說了事實的表面,因他不能說太多,「以前嘅事一句都唔會講,帶入棺材都唔會多講。」

豬油仔與沙皮狗

六、七十年代,全港煙檔(鴉片)和賭檔,幾乎由兩兄弟「豬油仔」和「沙皮狗」壟斷,如果不想被冚檔,檔口就要向警察交賄款,據當年打滾江湖的明叔透露:「賭檔煙檔保護費四百五十蚊,兩兄弟管超過二百多檔,賭檔多到數唔晒,收租都收到發呀!」沒有呂樂在背後撐腰,檔口一早被警察掃場。

替呂樂向這些檔口「收租」,那人就是沙皮狗,據指沙皮狗在重慶大廈六樓設立辦公室,還設有大型會議桌。地庫是夜總會,也是他們處理錢銀的地方。

《壹週刊》找到今年八十三歲的陳華山,重慶大廈甫落成他就住了進來,六、七十年代,他替沙皮狗做出納員管數,沙皮狗真名是馮九,陳華山尊稱他為「九叔」。

油尖旺揸弗人

當時沙皮狗勢力早已紮根油尖旺,陳華山憶述:「我哋幫夜總會睇場,夜晚冇嘢做就去飲杯,我哋唔使埋單,喺油尖旺以前我哋大晒。有佢(呂樂)喺度,邊個夠膽同沙皮狗鬥?」

沙皮狗當年是14K油尖旺區猛人,亦是重慶大廈話事人,七二年業主立案法團成立以來,沙皮狗連任法團主席至第四屆,退下來後再出任司庫,掌握法團權力十多年。他亦利用在重慶大廈的勢力,七十年代開了數間夜總會,如「新碧瑤」、「東魂閣」等,雖是夜總會老闆,但最主要的收入來源,還是替呂樂收數。

倚仗着呂樂的沙皮狗財源滾滾來,同時亦要上繳給呂樂。陳華山說:「呂樂俾權佢,香港、九龍(收)好多錢呀,交咗錢之後,佢(呂樂)就攞一批大嘅,十蚊佢就攞六、七蚊。」

呂樂打橫行

沙皮狗有一兄一弟,綽號「豬油仔」及「羊咩東」,同為江湖人物。陳華山說:「嗰時廉署(調查),沙皮狗大佬(豬油仔)認晒罪,令九叔入唔到罪。」

畢竟在江湖混過,陳華山把道義掛在心頭:「你點做嘢,我出去一句說話都唔會講。所以我到而家為止,一句都唔會講,以前嘅事一句都唔會講。」他欲言又止:「有啲嘢我知㗎!不過我扮唔知啫!」

陳華山負責管錢,他說:「有啲人我見過好多。咩人呢?收兩份人工嘅。政府一份,沙皮狗出一份。」當年廉政公署未成立,很多警察腳踩黑白兩道,以職權貪污,收取保護費。陳華山笑言:「有時佢哋同我傾偈話,呢份人工比佢哋(本身)嗰份人工仲多。」有如此龐大的靠山,沙皮狗可謂橫行無忌,陳華山笑說:「差館都同我哋一條路,呂樂係打橫行嘅。」

沙皮狗於本月中因糖尿病去世,下月出殯,大佬豬油仔去年過身,兩大黑道巨頭雖離去,但重慶大廈仍留下不解之謎。

撰文:陳慧瑩﹑鄭靖而
攝影:韋平﹑王晴

相關連結:

【封面●獨家●五億探長呂樂】呂樂潛逃加拿大 現場直擊 重慶大廈兩層神秘丟空四十年
http://bit.ly/2nbYv6E

【封面●獨家】呂樂瘋狂貪污五億 和合圖龍頭助收租
http://bit.ly/2Ah14qT
呂樂在五、六十年代權傾一時,橫行黑白兩道。後來他聽聞政府有意肅貪,六八年急流勇退,以四十八歲之齡提早退休。
沙皮狗當年有呂樂撐腰,可謂雄霸油尖旺。
陳華山曾替沙皮狗管數,提起有關呂樂的舊事他顯得小心翼翼。
熱門新聞
  • 何雁詩強迫棄養 鄭俊弘用倒鈎鐵鏈綁狗 244,001 views
  • 鄭俊弘把口話狗仔好乖 為氹女友將愛犬送走 44,536 views
  • 鄭俊弘被雪零收入身材暴漲 買嘢搵何雁詩埋單 38,733 views
  • 【難忘舊仇】梁思浩拒做《百萬富翁》嘉賓 請主持陳志雲食檸檬 28,593 views
  • 【人神共憤】鄭俊弘用倒鈎鐵鏈綁狗 何雁詩網上回應:我是狗癡⋯唔係好明發生咩事 28,366 views
  • 多災多難 何雁詩戀鄭俊弘連阿爸都唔撐 26,855 views