< 返回
  • 創業贏在老豆鬧爆 女傑青:佢話讀藝術做梵高乞食啦!
  •   12,695 views │ 2017年12月01日
    留言()

 

呢樣嘢真係我有,但你哋冇,就係我老豆。由我出世、讀書、去到有自己鋪頭,我老豆都話我唔得㗎。細個鍾意做手作,佢就鬧爆我話:「唔好搞咁嘅嘢!快啲讀書!」然後就掉晒我啲畫同作品。到大學讀藝術,佢就話:「返到嚟就乞食啦!做梵高啦!一世人都淨係賣得一幅畫。」

相關新聞:
【創業艱難】由劏房捱到三千呎大鋪 本地設計師最終
http://bit.ly/2ioCeAY

○八年攞到獎學金,我終於可以去夢寐以求嘅Central Saint Martins進修設計學碩士,佢話:「喂!納稅人啲錢嚟㗎,唔好浪費喎!」去到五年前攞十大傑青嗰陣,佢都係話:「你都得?」所以我人生每一個階段,佢都總係「激勵」緊我。

曾經我哋關係好差,我大學畢業後寧願搬去一間得一百呎,無廁所、無廚房嘅劏房,都唔想返屋企聽到老豆嘅「激勵」。最經典係我創業頭一兩年,被佢發現我食、瞓、住都喺嗰間劏房入面,佢就捉我落去巴士站,鬧我:「跟我搭呢班巴士返屋企!如果你唔返嚟,就以後都唔好返嚟!」好老土嗰啲電視劇對白咁呢。嗰陣落緊雨,放工時間成條街都係人,我喊晒,佢就好嬲咁鬧我,到依家個畫面仲喺我腦海入面,好清晰。

但係依家我大個咗,明白父母只係唔識表達,其實可能真係激勵,只不過用錯字眼。而我最叻嗰樣嘢,又係贏在起跑線,就係我專門縫縫補補㗎嘛!同我媽媽一樣,爛咗嘅嘢我都會盡力補番。同爸爸呢段關係撕裂得咁勁,唔可能靠支AA膠,兩秒就黐番埋。你一定要一針一線,將每個碎片,用心機拼番埋佢。

我用咗好多年去修補,畫幅畫都會俾老豆睇,搞展覽就捉佢嚟睇。雖然唔敢返屋企食飯,但我不時去外國擺展覽就帶埋老豆去,話就話搞展覽好似好型咁,其實咩都要自己落手落腳做,佢見到我咁認真去做好自己嘅品牌,就慢慢接受我嘅工作。

依家我哋直情可以大家戙高隻腳食花生飲啤酒,談天說地。我用緊老公同媽媽嘅名義,去助養貧困地區嘅小朋友,下一個就準備用老豆個名去助養,不過我仲慢慢解釋緊俾佢知,點解我要使呢筆錢。我覺得助養係一種福氣,我想俾咗嗰啲福氣佢哋,亦俾佢哋知道出少少力,影響力都可以好大。

我個「女」Fatina身上有好多補痕,代表我哋細個所有衫都俾阿媽補過。雖然以前住木屋區好似好慘,但起碼有飯食,件衫爛咗仲可以補,但係我哋助養緊嘅小朋友,佢哋屋企可能連買針線嘅錢都冇。

有人問我:「點解Fatina成日都合埋對眼?」因為我希望唔單只我可以實現夢想,所有人同小朋友都可以好似Fatina咁可以發夢,用個心去感受世界。

 

撰文:劉卓瑩
攝錄:林金展
由近乎決裂到現在父女關係得以修補,Prudence 閒時還會跟父親行山郊遊。
除了助養小朋友,Prudence 最近為宣明會設計了一副遊戲棋,連接手機還可以透過AR形式播放短片。
熱門新聞
  • 何雁詩強迫棄養 鄭俊弘用倒鈎鐵鏈綁狗 244,001 views
  • 鄭俊弘把口話狗仔好乖 為氹女友將愛犬送走 44,536 views
  • 鄭俊弘被雪零收入身材暴漲 買嘢搵何雁詩埋單 38,733 views
  • 【難忘舊仇】梁思浩拒做《百萬富翁》嘉賓 請主持陳志雲食檸檬 28,593 views
  • 【人神共憤】鄭俊弘用倒鈎鐵鏈綁狗 何雁詩網上回應:我是狗癡⋯唔係好明發生咩事 28,366 views
  • 多災多難 何雁詩戀鄭俊弘連阿爸都唔撐 26,855 views