< 返回
  • 【八卦陣】九西初選論壇 全場缺「關愛」
  •   9,172 views │ 2018年01月03日
    留言()

 

上星期六,九西初選三個候選人去旺角行人專用區出席論壇,不過要成功開檔都唔係咁簡單㗎,就算一早派人去霸位,最後都要同班熱愛勁歌熱舞嘅大叔大媽傾數,擾攘一輪先開到壇。

論壇一開始,就已經聽得出觀眾同其中兩位候選人有共同嘅「敵人」,即係民協馮檢基。好幾次基哥發言後都被觀眾噓,另外兩位對手姚松炎同民主黨袁海文,雖然話好尊敬呢位政壇打滾多年嘅前輩,但都雙雙夾擊基哥,追擊民協黨員退黨一事。

問答環節期間,姚教授唔單止放生袁海文,仲問佢:「據了解,民協嘅前高層,後來因為某啲事件轉咗去民主黨,你有咩睇法?」佢講緊嘅就係民協前主席莫嘉嫻去年六月退出民協,十一月決定加入民主黨。袁海文又串基哥,話海麗邨清潔工罷工都去搵職工盟,唔係搵當區民協區議員楊彧,又話民協副主席何啟明擺街站都唔見有插佢基哥嘅旗。

可憐基哥論壇上被人打到一額汗,路過嘅快必仲要加把口話:「馮檢基你都搞咗幾廿年,應該俾啲機會後生仔。我講嘅後生仔係姚教授喎,唔係袁海文。」搞到全場歡呼,睇嚟呢場初選,真係唔可以用「勢均力敵」嚟形容。

撰文:巫不言
熱門新聞
  • 林保怡篤完鮮肉男友激凸 淺水灣冧爆拍拖 49,735 views
  • 【獨家】千萬酬勞拍劇照推 胡杏兒:我一定要追多個 47,735 views
  • 【封面●老中青炒虛擬幣●遍地開花】直擊深水埗腦場變「掘礦機」場 開炒幣講座兩小時賺40萬 31,691 views
  • 陳志雲爆大鑊 佘詩曼拍劇拍到有陰影 31,191 views
  • 【索媽旅行有福利】黃伊汶露半球同囝囝索吻 蓋過梁浸浸風頭 30,940 views
  • 熊心如老豆三頭家 蘇韻姿弟妹唔同媽 28,492 views