< 返回
  • 【掃舖奇人自白】慶幸非屋邨仔 李根興拒做nobody
  •   10,356 views │ 2018年04月09日
    留言()

 

如果我係白手興家,如果係一個普通屋邨仔,我唔會行到買賣商舖呢條路。九一一之後,我係美國返香港。當時大約拎著自己儲嘅200萬元港紙,買咗依本書,「businesses that you can start」,逐頁逐頁睇。創業,只是有兩種方法,由零開始,或是買入一個現成生意,我發覺沒有人買賣現成生意,就係咁開始。

孤注一擲

買賣生意做咗十幾年,嗰時已經做到全港最大,幾乎乜獎都全部攞晒。香港講起創業、買賣生意,我講就係㗎喇,因為我係有信心到,我講就係市場嘅規矩。但我發覺做咩生意都好,都係業主賺錢,所以一三年,我將三百幾人嘅公司,霎時間減到六個人,轉做專注商舖基金。

我以前教人哋創業,一定要破釜尋舟,你係游水冠軍,但搞生意目的都係希望快啲到終點,賺多啲錢,但如果游水冠軍,唔夠跑步跑第十、第一百嘅快,咁不如離開游泳池去跑步。如果你離開游泳池去跑步,跑唔贏人哋,好多人就會跳番入游泳池走回頭路,所以我成日同人講,你離開得個游泳池,唔爭在將隻手斬埋佢,咁呢世你都唔會返游泳池。喺嗰一刻我就問自己,Edwin咁你夠唔夠膽斬咗自己隻手?你覺得買賣商舖基金條路前景好啲,好過買賣生意,就不如斬咗買賣生意,斬咗佢,就會有決心行呢條路。

怕做 nobody

我一三年決定轉型,但其實未諗好條路點行,買工廈好多人叻過我;去英國睇舖,地頭蟲叻過我;買住宅,好多人錢比我多,我諗不通。嗰時有基金搵我去買商場,我點同大基金鬥呀,點同領展爭呀,我諗不通。

我有時對住外面講嘢真係唔知自己噏緊乜,但問題係我唔可以同人講唔知自己噏緊乜,我無咗信心。個陣好多人睇我啲片,對我期望好大,好想加入我哋公司,入到嚟就好失望,發現原來李根興原來會講過唔算數,平時好多理論,但原來會講錯。睇你啲片好似好樂觀,但原來你係公司會發脾氣。

之後三年時間迷失咗,無咗信心,每日不停跑步,諗條路應該點行。 我阿媽就同我講,其實你唔駛擔心,你繑埋雙手,之前賣咗啲舖都賺咗錢,仲有屋企人支持,你一世都唔駛做啦,唔駛擔心咁多,總之relax玩多啲算啦。之後我就同阿媽講,你千祈唔好咁樣同我講嘢,我最睇唔起坐喺度乜都唔做,或者對個社會無任何貢獻,就咁純粹低買高賣,我唔想做嗰啲人。我曾經諗過自己可能只係一個炒家,不過人哋炒幾廿億、幾百億,你得少少身家就細細哋炒,係個好恐怖嘅感覺,所以你問我最大嘅推動力係咩,就係驚變成一個nobody。捱咗三年,決定一六年決定集中買賣三千萬以下嘅舖位,適合無買賣舖位經驗嘅投資者入門。嚟緊基金會先集資,後買舖,我至少出一半,現時個基金仲係細,四億左右,不過只係運作咗好短時間,我相信好快規模會加大,到時唔只集中三千萬以下嘅舖。

唔怕瞓街

如果我係一個普通屋邨人,我唔會行到呢條路,因為我起碼知道一樣嘢,我即刻衰到盡屋企人都會支持我,財務上、資金上所有嘢都會支持我,即係我起碼有個保險,我可以放膽去,我相信唔會瞓街。

細個屋企都有啲錢,嗰時住觀塘,阿爸喺錦繡花園買咗間屋,我哋成日星期六就一家人揸車入去住一晚,星期日出返嚟,當好似度假咁。爸爸七十年代來港,去工廠打工,後來阿爸喺屋企樓下雲漢街開咗間士多,叫「李川士多」,又開咗牆紙公司、裝修公司,又搞咗間車房,我都搞唔清楚,總之做唔住就轉。之後再做超級市場,成日都俾人偷嘢、爆竊,有一次班賊攞住槍入嚟打劫,捉咗我做人質,我估應該係四、五歲左右,總之我係唔識驚嘅,我係覺得幾得意,我仲記得個哥哥同我講,叫我點樣走埋嚟,捉住咗我,仲要拎住支槍,因為警察已經嚟晒超市門口,班賊走唔到,所以唯有捉住人質,後來仲喺門口開槍,後來阿爸靈機一觸,原來超市後門有個樓梯位,有個暗窗,可以放條路俾佢哋走,但放班賊之前同佢哋講,將啱啱偷嘅錢放番低,仲喺度討價還價,之後啲賊好驚,就放低啲錢走咗去,但後來阿爸同我講,原來放低嘅全部係大銀,大額鈔票就全部攞走晒,但點都好,意思就係起碼放低咗個仔,佢哋有條路走咗咪算數囉,啲警察後來都同我哋講,係啦放咗佢哋走,咪大家好辦事囉,啲警察扮吓捉賊,佢哋走咗咪算數囉,最緊要無人命傷亡,錢財身外物嘛。

因為咁阿爸就決定唔再做超級市場,咁先真正起家。當時轉行做地產代理,觀塘都仲未有中原、美聯,爸爸開左十幾間地產舖啦,好現實啦,嗰時嘅地產代理做代理之餘,自己都會炒樓,講緊係八十年代。去到九七覺得無得炒,就開咗康業做到依家。

一份錢兩份用

我哋一家人嘅錢,老實講現階段無話點分,總之需要錢就大家撥過嚟呢邊,如果財務突然間好生意,好多人借錢,我自然會買少啲舖,但突然間財務無人借錢,錢多咗,我又會買多兩間舖,無分嘅。至於日後點分,都已經一家人三口六面講清楚,三兄妹會分到邊一𡁫。我又唔覺得會爭產,而且我哋關係都好好,我架跑車,都係阿哥送俾我。

撰文:財經組
攝錄:財經組

立即按此連結Download《壹週刊》: https://goo.gl/NVySCK
熱門新聞
  • 【曾借錢度日】《逆緣》陳家樂3年冇錢開飯捱麵包 娶長腿索妹出頭 26,281 views
  • 【吳綺莉報警尋女】吳卓林疑現身加國超市尋爸 拎住濕被求人收留 24,504 views
  • 【菲傭玩殘我】國泰機回國變虐打受傷 僱主:係咪勒索? 23,539 views
  • 【避走加拿大 】李潤庭恨返TVB小三Tiffany落寞行街 23,319 views
  • 【52歲kiss】《逆緣》黎諾懿咀咀遲過陳偉霆 夏文汐全裸呢套戲仲正 22,615 views
  • 【兩少女爭富豪】白衣女爭贏白褲趙世曾 十指緊扣甜蜜拍拖 19,428 views