< 返回
  • 【wONdEr|一田一姐】俾客鬧過 珍惜前線員工:我好chur 但合理
  •   7,096 views │ 2018年05月10日
    留言()

 

「我係一個chur(趕急)嘅人,但再chur都好,我有不停提醒自己唔可以唔合理。」今年四十七歲的一田百貨行政總裁黃思麗(Susanna)語速快走路急,穿起高跟鞋的她走起路時會發出「 咯咯」之聲,極有電影中女強人的形態;一般CEO接受訪問前都跟公關「對好稿」,不但所有問題有官方答案,更要避重就輕,只答「精選」過的問題,但Susanna毫不避忌,一開口就直腸直肚,更指:「講野模稜兩可並無好處。」已貴為集團一姐的Susanna上任兩年,曾於短短十八個月內開了四間新店,說她chur並不為過,但並沒嚇怕一眾員工,全因其深明打工仔心態:「一定要對員工合理同公平,好簡單,你對人唔好人哋又唔係得你一個工作機會,佢就會走。」

俾客鬧過
「我試過幫客人入袋時被罵,我認為自己入得好乾淨整齊,而個客就多次回頭問我拎免費雪袋,當時我有啲衝口而出講咗句:『下仲要袋?』點知佢就立即話我包得唔好,話問你拎幾個袋又有咩問題?」Susanna手舞足蹈地憶述經歷,其非著重誰是誰非,而望緊記零售前線之壓力。「現時失業率好低得約2%,無論係招聘或留住原有員工都有難度,因為零售業畢竟係較辛苦嘅行業,要輪更,當每個人慶祝假期時又要去番工。」零售地方寸金尺土,不少公司均務求把店面位置擴到最大,犧牲了員工的休息位置。「有啲零售公司可能俾一個鐘員工食飯,但其實枱又無張俾人用,我哋分店地方再細,都堅持要有個茶水部俾人抖抖。」一田收銀員的工時也比同行稍為短一點,為八個半小時。

賞罰分明
談起上任以來作過最大的決定,答案竟出乎意料地非開了幾多間分店或引進了什麼新貨,反之是難以量化影響的一個措施:按工作表現調整花紅。Susanna解釋:「最難嘅地方係要同事明白,如果我睇到可以做得更好嘅地方,我係希望大家一齊做好佢,而唔係我嚟捉你做漏啲咩。」犯錯人人有,她最怕的是屢勸不改,更明言自己雖惡,但大家畢竟是成年人,因此絕不會放聲罵人。「如果有個同事表現良好,另一個表現普通,佢哋唔應該有一樣對待,月薪一樣的話就會喺花紅上有分別。」一田今年最多加薪5%,另每人平均可獲約兩個月人工的花紅,其更預計來年花紅總額將增加三成。

接任壓力
一田百貨前行政總裁莊偉忠曾以不開會及不捽數成為集團生招牌,形象深入民心,Susanna笑指:「比較我預咗會有,所以呢方面壓力不大,相反係一田咁多年嚟無論零售逆境順境都好,表現都唔錯,令我有怕過接任後未能保持優勢。」擔任過食品市場推廣,又曾是零售和消費品市場顧問的她,因而不停出招讓一田只進不退。「我想大家係嚟購物而非補貨,百貨業要一直做好,就要增加體驗嘅部分,就好似大埔分店咁,我哋重塑了嬰幼兒區,增設刺激五感遊戲嘅地方。」論及不同分店的異同,每週也會走訪各店一次的Susanna轉數極快地數出各類顧客的需求:「大埔家長較多,而觀塘星期一至五以辦公室客為主,但到假日就會多咗家庭到訪,兩者要嘅嘢唔同,貨架都要作出協調,將相應貨品推前推後。」

與莊偉忠風格不同,公司會議被Susanna「重啟」,她指出:「對我而言開會有個重要作用,就係要討論,討論過後大家要決定,跟住就行動,只要有呢三件事,我認為就係個值得開嘅會。」已為人母,同樣要顧及家庭的她最怕人浪費時間,「個啲叫FYI(for your information)嘅會就唔好開啦,send個email俾我就得。」簡單直接,大概就是她的管治風格。

黃思麗個人檔案
歲數:47歲
學歷:畢業於香港中文大學工商管理學院,期後於法國巴黎高等商學院(HEC) 考獲碩士及歐洲工商管理學院 (INSEAD) 考獲工商管理碩士榮銜。
工作經驗:曾擔任過食品市場推廣及零售和消費品市場顧問,2014年加入新地(0016)任職非地產業務的策劃及營運總監,2016年起成為一田百貨行政總裁。



採訪:黃綺敏
拍攝:于港民
立即按此連結下載《壹週刊》APP:http://bit.ly/next28app
熱門新聞
  • 【公屋女富貴之路】住3000呎大屋Cammi箝實賭廳老闆 飛甩強國富二代水源充足 35,874 views
  • 【嫁入百億富豪家】31歲《宮心計》李美慧 直升機閃婚56歲富商曾文豪 34,796 views
  • 【富豪苦痛誰又知】奚秀蘭嫁入豪門辛酸 老爺曾服80粒安眠藥 33,075 views
  • 【被MissHunny奚落】Myar麥芽打贏官司重新出發 向青春說sorry! 29,109 views
  • 【夜總會打爆鼻樑】《飛虎》吳岱融喜愛爛蒲得罪黑幫 感激鍾淑慧諒解:佢冇鬧我 27,729 views
  • 【四千萬嫁妝過門 】37歲阿嬌下周做人妻 老闆楊受成再加碼750萬厚禮 27,083 views