< 返回
  • 怪人處處有 選舉特別多
  •   8,814 views │ 2017年02月03日
    留言()

 

今屆特首選舉,其實唔係得胡官、鬍鬚曾、林鄭同葉劉呢四位參選人;截止過年前,已經有七位人士表態參選。究竟另外嗰三位係乜料?之唔係騎呢搞局分子囉。

睇翻選管會為今次選舉開嘅網上中央平台,其實仲有兩位參選人,分別係簡惠芬同劉子頴;另外,仲有一位泰國華僑王糧萱,亦都喺上週三開記招宣佈落場。

奧巴馬都識我
呢三個人究竟係咩來頭,《壹》仔就問過早喺上年十一月頭已經正式宣佈參選嘅劉子頴。佢劈頭一句就話參選係因為睇唔過眼「香港俾梁振英搞到亂晒」,政綱主打政改,仲話自己雖然係「one man band」加零選舉預算,但好有信心有足夠提名票入閘,仲話到時先會公開見傳媒。

根據阿劉生公開嘅個人背景,佢過去從事電腦相關工作,近年就做保安員,早年曾到美國升學,亦有居英權,但就為咗今次參選已經放棄咗。

呢位劉生無乜人識,咁究竟點攞提名呢?劉生就上晒腦咁話:「連奧巴馬都識我」,仲話自己曾經網上論政,連國際形勢都俾佢影響到。但現實係,佢承認決定參選前,曾經電郵泛民選委摸底,但冇人覆佢囉!

同習近平組成銅牆鐵壁
至於另一參選人王耀萱,網上資料竟然顯示,佢自封「中共中央海外辦公廳主任」,而習近平就係佢入室弟子,又聲稱成立「中華民族國家危機處理委員會」,發出嘅第一號文件就係宣佈由胡錦濤、温家寶負政治責任,而委員會曾邀請三十多個國家領袖同全球精英参與烏克蘭、香港政改、泰國等危機調停,佢本人更同習近平、奧巴馬、普京組成「銅牆鐵壁」。

最有經驗參選人
另一位參選人簡惠芬,網上資料顯示佢從事金融保險業,佢就應該係全港最有經驗嘅特首參選人,因為O二年同O五年嘅特首選舉,佢都有宣佈參選,選舉經費仲用咗幾萬蚊,主要用嚟喺婚紗店影咗輯參選用嘅證件相。

撰文:巫不言
熱門新聞
  • 「保齡神童」胡兆康 鼓勵乳癌患者 及早對付癌魔 129,985 views
  • 相戀年幾即娶 城城寵愛Moka舉止前所未見 55,087 views
  • 閃到盲 叻哥秀姑一球雪糕兩份食 27,562 views
  • 【入得廚房】容祖兒開騷賺錢 劉浩龍做「家庭煮夫」 25,188 views
  • 【夢熊論777當選】林鄭當選唔意外 曾俊華雖敗猶榮 24,966 views
  • 【為個唱執靚棚牙】林敏驄首日預售搶飛冧Server︰最好生日禮物 24,226 views