< 返回
  • 【less evil?】商界選委田北俊︰民主派要送曾俊華入閘
  •   3,890 views │ 2017年02月10日
    留言()

 

受內地生意的利益板塊牽動,不少富豪聽命中聯辦押注,結果令曾俊華處於民望高、提名票低的選舉低氣壓中,不過,代表商界的自由黨田北俊卻唱反調,率先表明他手上的一票將是曾俊華的第一票。

上月廿七日參選人葉劉淑儀與自由黨會面,爭取選委支持,當時田少缺席,同日他接受本刊專訪,大爆中聯辦各級官員亦向其自由黨四名立法會議員和選委發出「支持林鄭」的指示,唯獨沒有與田少聯絡,「冇人問過我,我估計可能佢哋知我會出去同人講。(叫你哋支持林鄭有咩理據?)冇理據,總之叫你支持。」

田少在大陸無投資,更沒有靠中聯辦取得區會和立會選票,用不着看中聯辦面色做人,拆解建制派人人爭做「奶粉」的現象,他自然可以「有嗰句講嗰句」。他解釋,商界過去多年與曾俊華和其財金、地產、旅遊系統均有緊密聯繫,至於林鄭月娥,商界認為她着重福利主義,即使只是小恩小惠,「呢方面點都好過曾俊華。」

在商言商,商界本應支持曾俊華,但連原本答應支持曾俊華的陳智思、李律仁之流,亦極速看風轉舵加入林鄭的競選辦,證明政治現實大於一切,「如果你唔支持林鄭,即係唔支持中央,好多商界變咗冇符。啲大財團個個都唔敢唔支持,香港已經唔係財團主要嘅生意範圍;咁嘅情形之下,只有曝光提名俾林鄭。但到時真正(不記名)投票,我相信好多係分開嚟投 結果泛民嗰三百幾票變咗決定性,到時就好難估計邊個會贏。」

在開名提名的機制下,曾俊華要取得足夠建制票入閘,似乎有難度,「選舉得一千一百九十四票,減咗泛民三百幾,建制剩番八百六十九票。如果林鄭真係喺中聯辦支持下,建制唔敢唔曝光,有七百提名,咁剩番一百六十九票喺出面,有葉劉又有胡國興,你話曾俊華攞唔攞到百五票?所以一定係泛民,特別係溫和泛民、睇落去唔係咁極端嘅泛民,高等教育、會計、資訊科技界,甚至好近中間、好近建制嘅泛民選委,就可能要令曾俊華有一百五十個提名入閘。」

由提名到投票,民主派忽然變了少數關鍵,無票在手的民主派支持者,正討論究竟是否應該以大局為重,採取「less evil」策略性投票「含淚」造王,踢走林鄭;還是堅守爭取真普選、不要八三一、拒絕廿三條立法等等的原則。

至於魔鬼在細節的廿三條,當年辭任行會以反對立法的田少,今認為立法是無可厚非,「立乜嘢法先,過程係點先,諮詢過程係點?廿三條係有牙老虎,定係少少牙,呢個都好大分別。如果立咗廿三條,銅鑼灣書店賣一賣書,係顛覆國家定唔係先?本地立法可以鬆可以緊,當企喺香港人嗰邊嗰個,愈鬆愈好;企喺中聯辦嗰個,愈緊愈好,絕對有分別。」

為送曾俊華登上特首寶座,田少再舉多個例子,力證民主派「包底」保送曾俊華入閘的重要性。「中聯辦上一次叫我哋支持唐英年,忽然叫我哋支持梁振英,又係臨時轉軚 人大同政協開會係三月,你唔使理個提名㗎,七百個提名俾林鄭,三月一日(提名期結束)之前咪撐林鄭囉,但到投票係另外嘅指示。」

梁振英上任時提出「香港營」,但過去五年令社會撕裂,不單將民主派拒諸門外,且用人唯親只用梁粉,田少則認為心目中理想的特首,必可包容民主派加入行會或擔任局長,「你可以用依家唔喺立法會嘅劉慧卿、梁家傑。泛民立法會議員,見到我阿頭喺行會,但又會同番個黨溝通,我想見到係咁。(俾完票你就論功行賞?)我覺得社會唔會咁睇,你梁振英淨係分俾梁粉,曾俊華係分俾全部持份者,咁你諗吓邊個會俾人鬧?我政綱係包容,包容就俾埋你哋一齊玩,到時我係落實政綱,點解你會唔忿氣?我唔覺得會。」

撰文︰袁慧妍
攝影︰傅俊偉

特首選情 盡在決戰3•26
http://bit.ly/ce326
熱門新聞
  • 【開心速遞隻鬼冇咗】不甘俾大台玩 顧紀筠兒子冇癮解約 57,460 views
  • 【大台性女】 馮盈盈當街吸啜咀男友面珠登 41,224 views
  • 懷孕甘比面容飽滿 拖實精神大劉出席酒會 37,497 views
  • 【中環人語•天空龍吟】大媽伸手入褲袋 日本師傅滴淚 36,650 views
  • 【中環人語●無陰功】每張單平均得40幾蚊 759林偉駿:搞優惠賺多幾蚊 36,216 views
  • 【胸前晃不停】何超蓮素顏跑街 36,132 views