< 返回
  • 【less evil?】建測規園選委林芷筠︰無條件抬轎好可悲
  •   9,271 views │ 2017年02月11日
    留言()

 

「提名期未開始,都已經幫晒佢(曾俊華)抬轎,其實都會幾失望。」

非建制派對於究竟要「含淚造王」還是「堅守原則」爭持不下,建築、測量、都市規劃及園境界選委林芷筠,坦言非建制派選委現陷入兩難,選擇履行選選委時的承諾,卻變成眾矢之的,「公眾期望都會對選委製造咗一個壓力,到底我哋想講返一個原則,遵從返我哋選舉時我哋嘅承諾,我哋唔會隨便放低個要求,原來係有咁多聲音係叫我哋,喂唔好離地啦,唔好超現實啦,如果你哋堅持原則,即刻跳個邏輯,就係會俾2.0當選架喇,你哋就成為罪人喇。」

她指出,部分民主派政黨的發言,都是為曾俊華無條件抬轎,「失望係會有」,她認為作為政黨,必須要帶領群眾回到民主運動,「你應該係要求嗰啲最有機會嘅候選人,去達成達成咩要求,而唔係喺度遷就緊佢哋。」

誰也想魚與熊掌兼得,不過要建制派候選人將「撤回八三一」放入政綱,又似乎是天方夜譚。林芷筠則指胡國興的政綱,起碼有作出新嘗試,「起碼佢提出嘅,倡議嘅政改方案,都嘗試走出八三一框架,去諗多啲擴大選民基礎嘅制度。其他(候選人)你唔可以就咁話,我都知道好多社會紛爭,所以適當時機(真普選),呢啲其實上幾屆都係咁講啦,曾蔭權年代何嘗不是,係咪重覆呢件事就代表香港人想要嘅嘢呢?如果咁樣講法,然後香港人都會好受落,其實香港人喺度自己降低緊個要求。」

林最看不過眼是,所謂less evil的論述,只是無條件幫建制派候選人「包底」,無助於推動民生議題和爭取民主,「如果你好快放鬆個底線嘅話,對於候選人嚟講,佢都會愈來愈,嘩,原來咁容易,唔使用啲心機去說服大家,你都係帶動唔到佢哋(候選人)去付出。起碼立返個指標,如果例如向幾個候選人提出,如果你想我哋提名,想我哋投票,一定要點點點,起碼有個說法,起碼列幾項,而唔係幫佢諗晒下台階,我哋都係要為大局為重,好似說服返啲選委,你唔好堅持呀,咁係會好可悲。咁不如一開始選選委前唔好講撤回八三一,直接講lesser evil啦,係咪大家都會誠實啲呢?」

與政黨不同的是,林不是政黨中人,不怕堅持底線會被票債票償,「我諗我哋所受嘅壓力,票債票償,我諗可能政黨都會日常接觸,都會驚呢個壓力多啲。我哋好多尤其專業團體,專業界別去選出嚟,我唔知大家選委會點諗,我個人其實又冇乜受到好大壓力,或者我哋都期望唔使我哋選啦係咪,唔通千秋百世咩。」

撰文︰袁慧妍
攝影︰梁譽東

特首選情 盡在決戰3•26
http://bit.ly/ce326
熱門新聞
  • 【拍賣后冠勞心腦瘤復發】李珊珊高燒休克 再call白車入院 68,108 views
  • 【港女發火】兇走MK仔港女:唔驚俾人尋仇 65,887 views
  • 【Saving哥背後的女人】多得陳法拉幫口放生 王浩信大台發圍 56,969 views
  • 全靠黃日華點醒 王浩信做好男人有運行 56,523 views
  • 【壹級急症】大便顏色透視健康狀況 黑紅灰最危險 55,270 views
  • 【《不懂撒嬌》失婚Annie有個餅印索家姐】譚凱欣原來係91版「陽光妹」 嫁柏芝前度朱永棠 52,222 views