< 返回
  • 【less evil?】法律界選委張達明︰參考公投結果 還票於民
  •   12,891 views │ 2017年02月11日
    留言()

 

近期人氣爆燈的曾俊華能否「眾望所歸」入閘,民主派選委陷入兩難︰究竟投白票是否浪費選票?下週二特首候選人提名期開始,民主派選委至今仍未有提名共識。

既然兩難,也許民間發起的公民提名和公投,是選委參考的指標之一。公民聯合行動委託港大民意研究計劃及理大社會政策研究中心,執行全民投票計劃,本月七日至廿二日,市民可透過 cast.popvote.hk網站,提名已向港大民研遞交意向書,以及已公開表示會參選的人士,包括曾俊華、林鄭月娥等人。任何人取得三萬七千七百九十個提名,即成為公投計劃的候選人,市民可於下月十日至十九日,就心水特首作出「場外投票」。

法律界選委張達明則聯同民主動力,力推公民推薦計劃,參與計劃的100至150個選委,會參考上述的提名意向,並於本月廿五日召開商討日,探討民主派該如何提名。

張瞓身推動計劃,皆因他認為手上一票不只屬於自己或是法律界,「希望可以還票於民。」他不抗拒選委提名曾俊華,以法律界為例,提名和投票意向並不會捆綁,提名曾俊華或胡國興亦是抗拒「欽點」的方法之一,「我哋法律界所有人,我哋都會堅守我哋嘅原則,我哋冇人話係因為一啲政治考慮,放棄我哋任何堅持嘅原則,如果唔係我哋都對唔起我哋嘅選民,但係喺堅持原則之餘,你點樣去善用你嘅提名票,點樣促進多啲競爭,呢個其實同原則係冇違背。因為一個人嘅參選權係唔應該受不合理限制,所以我作為選委,都應該盡量去讓一個有基本實力嘅人,佢係可以參選得到。」

非建制派有三百二十多票在手,理論上最少可推二人入閘,甚至為建制派參選人「包底」,最多推到三人入閘。張達明指選委應分工合作,「講得白啲嘅話,曾俊華、胡國興,我自己睇覺得佢哋係有基本實力。如果佢哋當中自己邊個已經有足夠提名,我哋就無須要嘥咗個提名票,係去俾佢,譬如講白啲嘅話,曾俊華,佢係已經有足夠建制嘅人提名,咁我又睇唔到有好強嘅理由,點解所謂非建制選委係要將個提名票再加落去俾佢。」

不過,除了建制派的候選人,選委們現時亦遇到一大難題︰若然長毛梁國雄取得逾三萬七千多個公民提名,選委又應否提名他入閘?長毛又是否一個「有基本實力」的參選人?另一法律界選委陳景生說︰「長毛呢,當然啦,佢用佢嘅方法,去推動香港嘅民主,但係喺呢一方面,如果佢用呢個方法,樣樣都係用佢依家現時嘅方法,如果佢冇改變時,佢適唔適宜做特首呢,亦都係一個考慮嘅因素。因為佢相當反傳統嘅方法嚟嘅,無論你話我好民主,我最終為你好,但如果香港市民個個都覺得你唔掂時,你就係唔掂。」

各選委都有不同的盤算和想法,張達明則非常理解小圈子選舉的遊戲玩法,「我唔覺得迷茫,由第一日開始,所謂參選小圈子選舉遊戲,其實都知道個政治現實,無論最後我哋攞到200也好,300也好,你都係喺1200人裡面少數,你嘅票數本身都唔足以係左右到大局。若果北風係吹得好清楚時,咁我相信起碼超過600建制嘅人係會歸邊,成個遊戲你超過600人支持一個人,嗰個人就當選,無論你非建制嗰啲係投白票,係投另外一個人,都影響唔到嗰600個人以上嘅結果。」

非建制派最後是否少數關鍵,最終還是要看北大人能否數夠票。但張達明亦非絕望到底,「阿爺唔俾你去改動選舉遊戲規則,但係我哋可以唔係淨係單單根據佢呢個小圈子遊戲規則做嘢。我哋喺場外,依家有電子公投,電子系統,你話冇一人一票普選咩,如果電子公投已經係超過一百萬人、百五萬人參與投票,嗰個已經同一人一票好近。」

撰文︰袁慧妍
攝影︰莫智謙

特首選情 盡在決戰3•26
http://bit.ly/ce326
熱門新聞
  • 【戲如人生做大佬】陳惠敏歎過日本紅星新藤惠美 45秒KO日本拳手 75,828 views
  • 【福臨門講大劉】大劉狠批水準下降 老闆:不會依靠一個客去生存 71,375 views
  • 【港女發火】兇走MK仔港女:唔驚俾人尋仇 61,445 views
  • 全靠黃日華點醒 王浩信做好男人有運行 53,894 views
  • 【Saving哥背後的女人】多得陳法拉幫口放生 王浩信大台發圍 52,861 views
  • 【《不懂撒嬌》失婚Annie有個餅印索家姐】譚凱欣原來係91版「陽光妹」 嫁柏芝前度朱永棠 50,946 views