< 返回
  • 【長毛零的突破】IT界選委陳宇明︰對部份民主300+選委失望
  •   12,419 views │ 2017年02月18日
    留言()

 

IT界30名選委之中,有5人提名曾俊華,5人提名胡國興。不過IT界選委兼公民黨成員陳宇明則有不同見解,日前在Facebook公布提名長毛梁國雄,無懼被一眾「薯粉」追擊。

「我又唔覺得我係第一票,第一票唔係應該劉小麗、朱凱廸佢哋咩?其實我唔係俾票毛哥,我係俾票公民提名出嚟嘅參選人。我背後係好支持公民提名呢樣嘢,既然我覺得件事依家大家好似冷待咁,我咪希望盡少少力講多啲囉。」陳宇明週五接受本刊電話訪問時說。

事實上,民主派政黨的確冷待今次的民間公民提名計劃,既無擺街站宣傳,亦無動員力推這個民主運動,連民主第一大黨民主黨亦稱七名議員會「All in曾俊華」,令長毛的選情更嚴峻。

「有樣嘢我好想民主300+回應返自己,嗰時嘅共同立場,即係反對八三一呢個框架,守護香港核心價值。我係有啲失望,尤其是唔endorse公民提名呢樣嘢。我覺得就算出咗結果,都話唔提名長毛,我係唔緊要,因為公民提名本身可能只係一個社會運動其中一部份,你可能最後都係覺得長毛同你唔啱理念,你唔提名佢,我覺得冇問題,但係我聽到有選委話,公民提名多餘,公民提名係另一種篩選,我係非常反感。依家長毛係講緊落街站,逐個逐個提名咁收,我覺得本身呢個動作,就算唔夠3.8萬個提名,都係值得回應嘅嘢,我覺得唔係一個多餘嘅事囉!」

但若然要根據民間公民提名結果,暫時曾俊華仍是跑贏大局,長毛排第二並正急起直追,但離3.8萬個提名還有一大段距離。陳宇明指出這是民間公民提名系統的問題,「曾俊華佢本身冇話過用公民提名嚟爭取選委嘅選票,但個系統將佢計埋入去,我係唔認同。就算曾俊華係話要用公民提名入閘都好,但佢本身理念同我哋唔同,佢冇解釋點樣反對八三一,點樣維護香港核心價值。如果佢要用公民提名入閘嘅話,我建議佢搵返建制派嘅人支持返佢。」

但現實上,無論公民提名結果如何,不少民主派選委已稱要揀個lesser evil參選人,要增加競爭、不要梁振英2.0治港云云。陳則認為提名長毛亦不見得是浪費提名票,皆因曾俊華本身應有建制票支持,「唔使要晒民主300+嗰150張票」,而提名階段他選擇理念行先,「喺依家呢個環境下,最符合民主理念的確係毛哥。」

儘管長毛如何努力落區宣傳,民主300+的同路人現時偏向提名曾俊華及胡國興入閘,長毛能取得150提名票的機會微乎其微。陳亦坦言,屆時去到投票階段就可能會陷入兩難,「我都未決定,提名嘅就想揀個相同理念,去到投票,睇吓仲有咩候選人,可能要lesser evil。」

撰文︰袁慧妍

特首選情 盡在決戰3•26
http://bit.ly/ce326
熱門新聞
  • 【拍賣后冠勞心腦瘤復發】李珊珊高燒休克 再call白車入院 67,872 views
  • 【港女發火】兇走MK仔港女:唔驚俾人尋仇 65,872 views
  • 【Saving哥背後的女人】多得陳法拉幫口放生 王浩信大台發圍 56,959 views
  • 全靠黃日華點醒 王浩信做好男人有運行 56,514 views
  • 【壹級急症】大便顏色透視健康狀況 黑紅灰最危險 55,258 views
  • 【《不懂撒嬌》失婚Annie有個餅印索家姐】譚凱欣原來係91版「陽光妹」 嫁柏芝前度朱永棠 52,214 views