李家鼎大仔李泳漢今日同拍拖兩年嘅圈外女友Conny奉子成婚，今晚喺沙田馬會設宴。上午，佢哋做足接新娘儀式，泳漢跪地同老婆咀不停，真恩愛。斟茶嗰時，由於鼎爺同施明離婚多年，所以分開飲新抱茶，鼎爺一副嚴肅同阿仔講：「今日開始你大個仔，以後要做個好老公、好爸爸。」反而對住新抱就笑口噬噬，溫柔得多，仲買咗對勁粗碌嘅龍鳳鈪俾新抱添！不過當鼎爺同對方戴龍鳳鈪嗰時竟然唔多識戴，要大妗姐代勞，騎馬耍家嘅鼎爺，竟然唔識呢啲手作仔，有啲搞笑。