唱出當今香港小朋友被迫狂操功課的苦況,但歌詞中一句:「明明我已晝夜無間想討好老母」,就被老屈成性的屈人者批評歌詞教壞人,小華媽媽懶理攻擊:「明明講緊TSA,你同我講嗰兩隻字做咩……係你掩住自己耳仔。」 ">
  • 劉小華天生天養 真 ‧ 老母轟香港普教中
  • 2016-01-24     0

 

熱爆全城的「毛記電視分獎禮」,在台上獨唱《補充練習無間做》的「劉小華」,被網民連日洗版大讚出色又老積,唱出當今香港小朋友被迫狂操功課的苦況,但歌詞中一句:「明明我已晝夜無間想討好老母」,就被老屈成性的屈人者批評歌詞教壞人,小華媽媽懶理攻擊:「明明講緊TSA,你同我講嗰兩隻字做咩……係你掩住自己耳仔。」

劉小華真名劉皓嵐,七歲的他不需用成績討好老母,皓嵐媽許善勤(網名「柔烽」),從不操兒子功課,寧願他開開心心返學不用讀名校,亦不望皓嵐贏在起跑線,只期望小種子能紮根我城。她拒絕做怪獸家長,因為皓嵐媽細個在強國長大,知道乜嘢先係真 ‧ 做人。

小皓嵐來自一般基層家庭,一家三口住屯門公屋,全靠劉爸爸在製作公司拍攝短片養家,月入不足兩萬元,想生多個陪皓嵐都唔夠錢又無時間。皓嵐的名字由外公所取,寄望他的人生能「保持內心潔白」。

皓嵐媽做師奶之前,在商台的天比高創作教攝影,認識了當時的創作總監、《100毛》及《毛記電視》「腦細」林日曦,「腦細」今次親自邀請皓嵐飾演「劉小華」,皓嵐媽幫朋友之餘亦深明這表演的意義:「想大家諗諗香港教育嘅未來。」

「劉小華」在台上揮灑自如「搶晒fo」,皓嵐天生有表演天分:「佗住佢嘅時候,我細佬喺屋企彈bass,佢勁有反應,跟住個節奏踢我個肚。」皓嵐三、四歲就跟本地樂隊Rednoon的鼓手學打鼓。他睇完電影《狂舞派》又想學街舞,爸媽都由得他。

「粗生粗養、天生天養」,這是皓嵐爸媽的教仔宗旨,只因他們兒時同樣在基層長大,老豆老母唔得閒管,因而天生愛自由。

 

草根

三十歲的皓嵐媽在香港出世,九歲時,父母要搵食,將她交予在中山的外公外婆照顧。生活環境突變,皓嵐媽小時候在大陸最難適應是語言,同學個個用石岐話溝通,她完全搭唔上嘴:「有嘗試過學,講完一句,佢哋笑到肚攣,我就決定唔再講。」

小時候尷尬的一幕,變成她的心結影響她教仔。皓嵐前年小學派位,只派到第六志願,皓嵐媽見學校就在家樓下,阿Q咁諗:「可以瞓到最後一刻啊,OK啦。」但註冊時入到禮堂,發現全部人竟在「煲冬瓜」,她想找個老師了解吓,但個個掛住「服務內地生」唔得閒,她才知大鑊:「明明係香港學校,但唔係服務香港人。」

經驗告訴皓嵐媽,阿仔在這兒返學一定不會開心:「我嗰陣真係喊出嚟,死啦,會唔會害咗個仔。」原本諗住隨遇而安,最後都要四出叩門。她找到一間區內名校,卻討厭它的虛偽:「明明簡介話唔會筆試,點知最後要百幾個六歲人仔,好似會考咁一排排坐喺禮堂……又係講一套,做一套,成績幾好都冇用。」

最後,皓嵐媽幫阿仔揀一間其他家長心目中的「南亞學校」:「校長都同我講,呢間唔係咩出名學校,冇人叩門。」但她觀課後立刻拍板:「係各類學生都有,上堂嘈嘈哋、坐唔定,但開心得嚟有禮貌,主動同我講拜拜姨姨。」學校有南亞裔學生也有內地學生:「見過兩個小朋友喺操場講普通話,俾老師話:『做咩喺學校唔講廣東話,唔識講都要慢慢講』。」讀小二的皓嵐去年考第二,但皓嵐媽冇特別催谷,考試前夕一於照去毛記。

 

撰文:關冠麒 攝影:胡智堅