登入
  • 網購水果競爭大 80後兄弟班體貼冧師奶
  • 2016-02-05    

 

日本水果好多人都鍾意食,不過唔係咁易隨時買得到。幾位80後型男,拍住上搞網購生意,睇準香港人日忙夜忙又心急,日本直送生果直接幫你揀埋送上門,今日上晝落訂,即日下晝送到。

「水果兄弟」由上年5月開始營運,32歲嘅Cyrus同31歲嘅Marcus,仲有另外兩位今次無出鏡嘅80後型男係公司主力,其他同事亦都係80後,非常年輕。佢哋一開始都係見到市場有需求,就去試吓做。明明有超市有果欄,仲有得做?佢哋話唔係要同佢哋爭:「超市一般會賣一啲低價嘅大眾水果;而我哋就會賣一啲相對高質素嘅水果。」

公司陽盛陰衰,八位同事得兩個女仔,顧客有八成都係女性,大多都係一啲朝九晚五嘅上班族,或者係家庭主婦。同大型網購物流公司相比,水果兄弟嘅服務都好體貼。

水果係容易受損嘅食品,壓一壓都會影響到品質,而公司一直強調自己以方便為賣點,唔設立門市,可以經電話、網上落訂,有自己車隊,仲有彈性嘅送貨時間,最夜晚上十點都送、地點偏僻都無問題,又同日本農場有直接聯繫少咗成本,價錢更加平。

除咗水果,仲有食品,好似果肉啫喱、果汁都有唔少人捧場客。公司開業至今八個月,成績都唔錯,去年12月做80萬生意額,平均每日接單四十至六十單。眼見現時網購對手日增,佢哋都唔介意有競爭,希望建立出經營模式,令多啲香港人認識,之後再發展其他嘅網購平台。