講減肥瘦身,呢啲係終身事業嚟嘅,香蕉蘋果減肥法、肉食餐單乜乜乜,講起都一大堆「妙計」,最多人聽過必定要數戒澱粉質餐單。不過日本日前報導,以「戒醣(即戒澱粉質、碳水化合物)」出名嘅減肥達人桐山秀樹於2月6日喺東京一間餐廳內因為心臟衰竭猝死,終年61歲。雖然佢嘅親友都否認桐山嘅死同戒醣飲食法有關,不過今次意外令各界重新關注戒食澱粉質對身體嘅影響。 ">
  • 戒食澱粉質出事? 日減肥達人猝死
  • 2016-02-19    

 

講減肥瘦身,呢啲係終身事業嚟嘅,香蕉蘋果減肥法、肉食餐單乜乜乜,講起都一大堆「妙計」,最多人聽過必定要數戒澱粉質餐單。不過日本日前報導,以「戒醣(即戒澱粉質、碳水化合物)」出名嘅減肥達人桐山秀樹於2月6日喺東京一間餐廳內因為心臟衰竭猝死,終年61歲。雖然佢嘅親友都否認桐山嘅死同戒醣飲食法有關,不過今次意外令各界重新關注戒食澱粉質對身體嘅影響。

桐山秀樹於2010年患上糖尿病,為咗控制病情而參考江部康二醫生研究嘅「限醣飲食減肥法」建議,三餐唔食米飯、麵包等碳水化合物以及甜食,結果體重喺3星期內勁減20公斤(即係44磅),由87公斤下降至67公斤,一瘦成名。

其後又出版減肥書籍《不吃主食1週速瘦6公斤》,分享自己戒食碳水化合物主食、隨意食魚食肉等等減重心得,當中更指中、老年人士用佢嘅方法的話,唔使睇醫都可以克服糖尿病。

但醫學界一向都唔主張低澱粉質減肥法,因為人體需要大量葡萄糖維持能量應付日常需要,而五穀類中嘅碳水化合物經人體吸收後可轉化成葡萄糖,喺食物金字塔都有教要食最多喇;如果攝取唔到足夠嘅能量,輕則四肢乏力,重則暈低都似。

而且有營養師指出,食少啲啲嘢,人體已經識自動燃燒脂肪去獲取能量;不過以為唔食五穀類等於減肥,其實都會好自然食多咗其他餸菜,分分鐘多油多鹽,反而令身體攝取嘅脂肪仲多咗,越減越肥。均衡飲食,多做運動先係減肥嘅好方法。