立法會今日(3月3日)續議俗稱「網絡23條」嘅版權修訂條例草案,九龍東直選議員謝偉俊,喺會上不點名批評,指有啲創作人「不思進取」、「食老本」,「上咗位」,唔使積極創作,所以唔介意其人抄襲版權咁話喎。而填詞人黃偉文都不點名暗寸:「你嗰個乜乜超人,咪二次創作囉」,乜水都乾晒。 ">
  • 被謝偉俊寸食老本 黃偉文反擊:滿口歪理
  • 2016-03-03     0

 

立法會今日(3月3日)續議俗稱「網絡23條」嘅版權修訂條例草案,九龍東直選議員謝偉俊,喺會上不點名批評,指有啲創作人「不思進取」、「食老本」,「上咗位」,唔使積極創作,所以唔介意其人抄襲版權咁話喎。而填詞人黃偉文都不點名暗寸:「你嗰個乜乜超人,咪二次創作囉」,乜水都乾晒。

講番個會謝偉俊講咗乜先:「有啲上咗位嘅、或者相對嚟講成咗名嘅本地作家,啲名我唔講喇」,「已經不思進取喇,佢哋甚至乎唔係好介意人哋抄佢啲嘢,甚至公開、公然挑戰話:『你抄我,我唔介意』咁。」,「因為佢哋已經食老本,因為佢哋嗰啲已經唔會再去創作,亦都唔需要好努力去創作,因為佢哋已經有一個版權,去保護佢哋以前嘅創作,已經夠食喇,上咗位喇。只係啲新嘅、後生嘅朋友先至更加緊張呢一方面。」

而謝偉俊一身粉紅色緊身衣,扮「法律超人」,查實都有版權,佢今日自爆埋當年電影公司「華納兄弟」要求過佢放棄「法律超人」呢個形象,否則告佢侵權。引起爭議之後,佢先申請註冊商標。

曾經公開表示「我啲歌詞隨便改」嘅填詞人黃偉文(Wyman),今日亦喺facebook反擊,更以小鳳姐名曲「大亨」二創作歌詞:「邏輯呢?邏輯呢?」,抽乾謝偉俊言論,暗指導對方身為律師「零邏輯又反智」,又駁斥指「只有創作力源源不絕的人才不怕大方宴客吧」。

當然唔少得要寸吓「法律超人」食足廿幾年老本:「你嗰個乜乜超人,咪二次創作囉,你而家又去反二次創作」,最後再霸氣一句:「滿口歪理,不再回應!」作結。