• 上海迪士尼車站 冇米老鼠得LED燈
  • 2016-03-04     0

 

隨住上海迪士尼宣布今年6月開幕,上海地鐵迪士尼站嘅外貌最近亦都曝光。設計係由當初6個設計方案中得票最高嘅方案2為基礎,叫做《屬於你的夢幻之旅》,以「連接現實與夢幻的時光隧道,帶你進入神奇國度」為宣傳口號。

《壹》仔拍埋設計圖同現實相,覺得個車站真係設計得非常好,完美呈現現實同夢幻嘅遙遠距離。設計圖上嘅車站以藍色為主調,仲有唔少米奇頭裝飾,月台天花版有好多盞細燈,營造漫天星空嘅感覺,閘口嘅天花版又有一堆波波,搞到好似好夢幻咁。

設計圖就睇完啦,咁實物又係點呢?車站外牆就唔見有一粒粒圓形物體,門口個強國味十足嘅「迪士尼站」四隻大字……冇得比較喎,設計圖好似冇車站外殼睇,直接睇內部裝修好過。

唔睇猶自可,一睇就嚇到傻咗。門口嘅LED燈又紅又綠,字體仲好似係新細明體。嗱,唔係話新細明體一定代表差、求其,不過個車站喺迪士尼,好心就花啲心思設計字體啦。

大堂中間就有天幕,引入自然光,聽落就唔錯啦,但係整體設計幾單薄,都係嗰句,唔夠夢幻,同一般車站冇乜分別。

原本網民好期待上海迪士尼車站會同香港一樣,會有專屬列車同夢幻車站,點知夢幻同現實堅係差太遠,所以唔少網民都好失望,又話題同當初嘅設計圖完全唔同:「迪士尼……最起碼弄的可愛點吧這真是不能更醜!不看那幾個字誰能想到是迪士尼站!」「這種金屬感滿滿的顏色也算是中國風?別逗了!還不去一般的車站呢……」「真心醜哭,色調和造型感覺既廉價又單薄,還會給人一點都市感的冷清。童話世界裡的那份夢幻、天真、絢爛哪裡去了!?」

官方其後解釋話,之後會喺大堂加上米奇老鼠同唐老鴨等裝飾,不過暫時仍然未有進一步工程進度資料。希望真係會加番,唔會爛尾啦吓。

圖片來源:網絡圖片