• 文件鬥霸氣 誠哥4叔50年恩怨
  • 2016-04-20    

 

李嘉誠與李兆基同樣88歲,同樣屬龍,亦同樣是地產發跡。想當年兩人friend過打band,4叔細仔Martin仲叫埋做李家誠。但近年兩人不單無兩句,仲傳聞會避開見到對方嘅場合,有你無我。點解呢?

其實喺1993年前,佢地係非常老友,仲拉埋另一好友鄭裕彤搞生意,以及打吓golf。每周一聚,形影不離。92年長實同恆基仲共同發展西半山樓盤嘉兆臺,其中「嘉」代表李嘉誠,「兆」代表李兆基,以證友誼。

不過93年後,兩人關係急轉直下。原來當年長實想聯同外人,向美麗華集團提出收購,但當年掌管集團嘅楊志雲家族唔想放手,搵來世交李兆基幫拖。左手又係肉,手背又係肉,李兆基最終出手,美麗華最後亦落入恆基手中。此後雙李漸疏離,甚至曾隔空互窒。其實兩人加埋都就200歲,恩怨已煙消雲散,幾時可以來個世紀揸手?