• 坦白講》社工勇救被車撞唐狗 求生不求死態度要學
  • 2016-07-12    

 

周學政(周Sir),29歲,狗隻訓練員兼社工,為有特別成長需要的青少年及兒童進行動物輔助活動。他有空便到狗場當義工,照顧無人理會的街狗,更因此遇上唐狗「傻福」,救了牠一命。

「仲記得兩個月前嘅嗰一日,我喺元朗錦上路狗場照顧緊啲狗,突然聽到『砰!』一聲巨響,接住係狗仔嘅悲嗚聲。我立即衝過去,見到一隻唐狗訓喺馬路中心,佢眼和口部都係血,已經不能動彈。我好痛心,亦好慌張,即刻打俾另一教狗師兄李Sir,問佢點算。佢叫我唔好亂移動隻狗,打俾愛護動物協會救助。隻唐狗好虛弱,有幾次佢都想合埋眼,我都會叫住『唔好瞓啊,撐多陣!』跟住佢又會開番眼,終於等到愛協救援員嚟到,送咗佢上救援車。」

「獸醫估計唐狗撞到頭部,並且盤骨嚴重受傷,即使康復都只能擁有95%一般狗隻機能。經過一輪照X-Ray,打止痛藥,吊鹽水,做手術,留醫,終於救番佢條命。但跟住我就開始擔心第二樣嘢,就係領養問題。我自己屋企得二百呎,唔符合領養求,而對於香港人嚟講,唐狗係唔值錢,好少有人想養。正當我擔心佢無人領養而被人道毀滅時,有位狗義工願意接收佢,李Sir亦指自己嘅寵物店有空間有人手,可以幫手照顧。見到有咁多人錫佢,我就為佢改咗個名叫『傻福』,傻狗有傻福咁解。」

「傻福只有一歲,雖然未完全康復,但佢生命力好頑強,係一隻好活潑又乖巧的唐狗。我都會訓練佢,為將來有其他人願意領養佢作準備。由於佢俾車撞過,一見到車時,佢情緒就會特別激動敏感,所以我特別會帶佢去停車場,等佢習慣有主人拖住就有安全感。我亦會同佢做觸感訓練,即周圍摸佢,例如:手腳,面,牙齒,肚腹等,要佢唔怕俾人掂,而且令佢知道掂佢的人無惡意。傻福嘅個案甚至被傳到台灣做教學,但其實只係冰山一角,漁護署每年處理五千至七千隻流浪狗,有好多被車撞死而無人會理。」