• 太和的後裔》成員分工效率驚人 成功動員上千居民
  • 2016-07-13     0

 

這班太和的後裔來自各行各業,組織力與效率同樣驚人,「我記得十二點入group,三點已經有人整好傳單,有人放假幫手拎去印,八點出嚟摺傳單,十點已經派緊。」Cherry憶述當日的「突擊戰役」,最終成功令逾千名居民出席大會;會後關注組成員每晚放工,繼續在邨內向街坊派單張又收集簽名。

成員同時各自發揮所長,例如傳單用字會由任職小學教師的成員先過目才出街,網上單張及改圖就由從事設計、熟悉圖像編輯軟件的成員操刀。

「我哋都係識咗個幾禮拜,以前未見過佢哋,唔知邨入面有呢啲人。」成員阿偉指自己事前並不認識各人,還強調自己是鍵盤戰士,「成日都話香港人自私,有咩大事,我要返工囉,個個都係咁嘅藉口,都係幫咗自己先,唔到切身都唔會理,今次跳出鍵盤,主要因為真係關自己事……估唔到今次太和邨(事件)行到出嚟嘅係咁多人。」

另一成員Helen就活用返工時間,在公司透過WhatsApp跟成員討論行動,「返工八個鐘有三個鐘傾緊,有時miss咗冇睇,積成幾千個message,追唔番post㗎」。至於現職保險從業員的鄭煒,去年曾競逐大埔運頭塘區區議員但落敗,「選完本身想休息吓,突然殺出一個圍標疑雲,冇得唔再企出嚟。」他就負責宣傳及資料搜集;另外,亦有成員因感到團隊缺乏法律意見,就趁自己正修讀屋宇裝備工程高級文憑,借機向老師問意見,包括業主權利及如何「整冧」法團等。

成員各司其職,但邨內不少長者本身是操鶴佬話的水上人,關注組難以跟他們溝通講解事態發展,後來有懂鶴佬話的新成員加入,就成了「長者專員」,專責向長者解說,「佢哋知你都係鶴佬人就會放心啲。」成功拉攏不少鶴佬居民簽名支持,同時還有不少屋邨師奶以最強的口耳相傳相助,成功團結不少邨民。

群眾力量驚人,天價工程最終觸礁,法團近期終於屈服,決定把工程重新招標,同時只維修其中一幢福和樓,關注組算是獲得階段性勝利,但由於工程現時仍未有定案,Cherry坦言,經過此事後,看穿法團並非為居民着想,所以希望能再下一城,「我哋會繼續收集街坊簽名,然後召開特別業主大會,拉倒法團。」

撰文:李啟發、羅霈潁
攝錄:鄒潔珊、翁少陽