• 日產話你知 放心呢部Note唔會爆炸
  • 2016-11-04     3,281

 

近排聽到個Note字,人人都雞飛狗走!咁又唔使咁驚,唔係嗰部電話呀!講緊嘅係喺香港靜咗好耐嘅日產終於有新搞作,選擇咗好日子同日本同步發布佢地嘅小改款Note。成部車最吸睛嘅地方係外形,轉用咗嶄新嘅V-motion家族鬼面罩設計同新款泵把,加埋Z形LED尾燈,感覺比舊款型咗好多。車廂入面最顯眼改動地方係軚盤,用咗個外形同手感都相當sporty嘅平底軚盤,點解個款似曾相識?呀記得喇,啱啱喺巴黎車展亮相嘅Micra,都係用呢個軚盤,另一個改動位係座椅,轉用two-tone雙色配搭,望落亦都係sharp咗好多。引擎就冇改動,依然都係呢副好慳油嘅1.2公升super charged引擎,超闊落嘅後座亦都維持不變。唯一變嘅,係售價要十七萬幾,代理解釋,係因為yen高咗好多,體諒吓喎!

撰文/攝錄:廖宏俊