• 【11月開個唱】好友離世患輕度抑鬱 湯寶如復出主持《流行50年》救自己
  • 2017-10-26     0

 

湯寶如最近因主持大台節目《流行經典50年》而頻頻亮相,湯記話之所以會決定接下這個節目做主持是因為一位好友的離世。湯記:「當時有個好朋友突然離開咗之後,我非常唔開心,嗰排成個人情緒好低落,直情係唔想食嘢,唔想同人講嘢!誇張到連工作都唔想做。」因為好友離開而情緒低落,經常收埋自己,後來家人覺得佢情緒出現問題,湯記睇醫生先發現自己患上輕度抑鬱,醫生鼓勵佢多啲出去接觸人群,咁啱《流行經典50年》就邀請佢做主持,佢就下定決心要走出嚟。湯記仲分享其實一開始佢只係接咗做四集主持,點知播出後反應好好就一直做到尾喇!

不經不覺原來湯記已經出道25年,所以下個月15日佢將於九展舉行《獨愛音樂25周年演唱會》。湯記表示其實本來真係無打算開騷,只係因為公司提出問佢要唔要考慮開個演唱會紀念一下,如果唔係就好似嘥咗個機會咁,所以先開始搵場地。不過搞得成演唱會都未係最圓滿,因為佢透露本來佢係想推出一隻大碟嘅,但無奈時間上配合唔到,所以唯有出住一首《獨愛》頂下癮先啦!