• 【太陽花海重生記】戒毒村太陽花救人 女導師花喻人生:生命好奇妙
  • 2018-05-29    

 

這天氣溫高達三十多度,太陽恣意地烤著大地,謝愛萍穿著紅色連身裙,戴上太陽帽,一邊自在地在太陽花海中行走,一邊跟記者介紹園內的太陽花的品種:「我哋以前種黃芯,而家呢啲係啡芯,我喺雀仔街買啲種子返嚟,花都係喺呢度戒毒嘅弟兄種。」頭上太陽曬得毒辣,謝愛萍仍笑得燦爛。這個太陽花園位於基督教新生協會在上水的新生園戒毒村,謝愛萍兩年前在這裡做義工,後來成為協會的項目統籌。園內除了種太陽花,亦會種菜,全由村內的戒毒人士打理。協會下月初會舉行太陽花義賣日,但謝愛萍苦笑說,本月連熱十二日,花期比預期中早開。

謝愛萍曾從事生態導賞,她說,接觸大自然有令人開心的能量,「之前自己種過,發現種出來之後,會令身邊嘅人好開心,經過見到嘅人都會好開心。」她說,希望一棵棵太陽花可以令村內充滿正能量,「戒毒人士由一粒種子開始種植嘅時候,佢哋會感受到,原來只要佢哋花心思、愛心,慢慢就可以種植到一顆六、七呎高嘅太陽花,畀佢哋感受到生命真係好奇妙。」笑起來眼睛彎彎的她,多年前曾患上抑鬱症,發現走到大自然的時候會感到舒暢,「行山嘅時候,同大自然接觸,會探索到好多自己嘅生命。班弟兄都可以更靠近大自然,知道生命嘅重要,畀佢哋接觸正確嘅生活態度,一定會有個步驟,唔係好似佢哋以前咁走捷徑。」

一六年謝愛萍確診乳癌第三期,但亦是這個時候,她由義工轉為協會的全職員工,有更多機會接觸戒毒人士,「其實佢哋同正常人分別唔大,只不過佢哋吸毒,都係生命上唔開心,或者係原生家庭導致佢哋走上吸毒嘅路。」在患病接受治療期間,她也有繼續探訪戒毒人士。一次她到醫院探訪一名入住精神科病房的吸毒人士,因當時自己剛打過化療針,怕被感染而戴上口罩,「被探訪嘅男士就同我講:『你好驚咩?戴住口罩嚟見我,如果驚就唔好嚟。』」後來她解釋自己身體狀況,該名吸毒人士反而願意向她打開心房,「佢聽到我咁講,就覺得好唔好意思,然後開咗個心咁同我傾偈。原來我係一個病人都可以去幫人,可以俾佢正能量,咁亦都幫助到我當時的病情。」她形容戒毒的過程就像治病一樣,「佢入嚟戒毒,其實好似醫病咁,咁我病咗我都要去醫院醫病。我哋都會喺生命上遇到不同挫折,有好多挫敗感,我哋都係以同行嘅方式去走呢條路。」

撰文:鄭靖而
攝影:林志謙