• 【踎大台23年變路人甲】《BB來了》蓋世寶得一句對白:其實可以考慮下我㗎
  • 2018-07-12    

 

或者因為童年回憶嘅緣故,喺《BB來了》見到LuLu姐姐蓋世寶會特別留意一下,但睇多兩眼就有種莫名哀傷,因為佢喺大台大大話話做咗廿幾年,可惜《BB來了》中只做閒角陪月學生,莫講話談育嬰,連對白都係得一句無關痛癢嘅講下。



LuLu姐姐,相信好多80、90後都唔陌生,話晒佢歷經《閃電傳真機》、《至Net小人類》同《放學ICU》三個兒童節目,足足18年,係繼譚玉瑛姐姐之後,主持兒童節目最耐嘅一位。

唔知大家有無同感,現年39歲嘅佢其實都Keep得唔錯,仲有啲少女味添,所以見佢喺劇中圍喺班陪月員阿姐當中好似有啲格格不入。另外,一直見佢企喺人群嘅外圍,好似攝唔入去咁,都估到佢不單只無戲份,甚至連對白都無架喇!好彩,最終都講到一句:「其實可以考慮下我架!」

係囉監製們,開劇時多啲考慮下大家嘅童年回憶LuLu姐姐啦,拎住大台底薪嘅佢開工不足,手頭上得返一套《多功能老婆》可以拍,而原本擔任主持嘅《一周八爪娛》,最近都因為TVBI解散而cut埋,LuLu姐姐都係如常去到化妝間準備主持新一集時,先被通知節目完結,搞到即刻坐返公司城巴返歸,認真陰公架。



請參與壹週刊大獎賞活動!有機會贏取郵輪假期‎、名牌腕錶、4K超高清電視或金箔護膚品,仲有機會同陶傑共晉晚餐添!

即按 http://bit.ly/Appinstall18