• 【離開大台有啖好食】39歲人夫李雨陽發福 車軚現形仲有肥仔波
  • 2018-09-21    

 

八、九十後或者會對李雨陽印象最深刻,畢竟2003年一套《當四葉草碰上劍尖時》相當受年輕人歡迎,而當時初登熒幕嘅李雨陽已經孭飛做男二,加上一把長髮以及有錢仔設定,十足《流星花園》道明寺,迷死唔少港女。不過15年過去,當年男神已經係39歲嘅人夫兼人父,肚腩仔好難避免,仲有少少肥仔波添。

以前高大英俊嘅李雨陽,39歲有啲中年發福,車軚位現形又有啲肥仔波。不過,除咗肥咗少少之外,其實個樣無咩變,加上成6呎2高,所以就算戴咗cap帽,但要認出佢絕對無難度,更何況佢老婆只得5呎2,兩公婆拍埋一齊個落差相當明顯,好難唔引人注意。相對於李雨陽發福,老婆上年年尾先生完B仔,但話咁快已經變返嬌小窈窕,呢日熱褲露腿look睇落簡直成個少女咁,點睇都唔似人母。

其實李雨陽應該係幸福肥,話晒唔使再踎大台做閒角捱騾仔,搞到生活拮据到試過借財務公司30、40萬,甚至差啲答應蕭定一邀請拍三級片。近年李雨陽轉投賣原味雞生意,每季銷售額達7位數,扣除開支後每月都有3萬幾純利,遠超喺大台嘅收入,所以放假同老婆食日本嘢撐下枱腳不知幾happy。



立即下載《壹週刊》Apps,隨時隨地睇盡時政專題、深度偵查、娛樂熱話!

按此連結 http://bit.ly/next28app