• 【45歲生日有花收】結婚10年一樣恩愛 張晉難忘蔡少芬三次拒愛(足本版)
  • 2018-09-24    

 

9月17日係蔡少芬Ada嘅45歲生日,老公張晉當然陪佢過啦,同行仲有兩個朋友。生日正日老公送花就梗架啦,壽星女同朋友邊行邊講,好開心。一行四人先去戲院買定飛飯後睇戲,生日多啲節目都啱嘅。高老公少少嘅Ada,一隻拎住紮花,一隻手搭住老公張晉膊頭,呢個畫面,真係好有愛呀!

結咗婚10年,大女7歲細女5歲,張晉同Ada一樣咁恩愛,令到唔少人羨慕。講番佢兩個,想當年,張晉識咗Ada後,好快就鍾意咗呢個女仔,先後示過三次愛都食檸檬收場,不過,佢冇放棄到,繼續留守喺Ada身邊。直到有次張晉要陪朋友嘅女朋友,好耐冇搵Ada,搞到Ada嬲到叫張晉以後都唔使搵佢喇,張晉聽到即刻飛撲去搵Ada,叫佢唔好呷醋之餘,仲乘勢叫佢試吓同自己拍拖,就係咁,佢兩個就一齊咗。張晉同Ada一齊嘅時候,各方面都不被睇好,好彩Ada一直喺身邊支持佢,一遇到機會,張晉就發圍喇!14年,張晉喺金像獎得到「最佳男配角」獎時喺台上講:「我嘅老婆係蔡少芬,好多人話我呢輩子都要靠佢,係呀,我想講我呢輩子嘅幸福都靠佢。」呢句說話,令到唔少人感動!

攝錄:吳斯金

立即下載《壹週刊》Apps,隨時隨地睇盡時政專題、深度偵查、娛樂熱話!

按此連結 http://bit.ly/next28app