• 【流淚講見證】車婉婉跟Sammi信主 爆喊分享由感情絕望 到戒煙遇上老公……
  • 2018-11-05     74,796

 

有份喺新劇《是咁的,法官閣下》飾演法官嘅車婉婉,依家擁有一個幸福家庭,最近佢為五個牧師嘅夾band騷《We are with you》做表演嘉賓,佢嘅出現同分享,估唔到成為全晚感動人心嘅位。

大家記唔記得,車婉婉曾經沉迷鑽研塔羅同星座,但今日佢同老友Sammi一樣,選擇信靠主。原本只係唱歌,點知變咗佢首次見證分享會。講到信主經過時,佢更忍唔住喊,好多現場觀眾都俾佢嘅分享攪到眼濕濕架!當晚佢話,以前好鍾意搵相士批命,好多相士都批佢無姻緣,嫁唔出。結果係點?依家佢咪就係擁有美好婚姻,同一個可愛囝囝嘅幸福女人囉!由戒煙到遇上老公,呢個過程就等大家睇片聽佢講下啦!

之後佢獻唱老友Sammi嘅《上帝早已預備》時,心情依然好激動,當晚佢嘅另一半,都有嚟捧場,為佢打氣。今日得到一個家庭,車婉婉心裡知道,呢份祝福,係邊個為佢預備!