• 【天后為愛去到盡】同霆鋒經歷18年三離三合 王菲幫竇唯倒痰罐 (足本版)
  • 2018-11-10     45,057

 

貴為天后嘅王菲,咁多年情路崎嶇,經同竇唯、李亞鵬兩段婚姻,都離婚收場,仲有同霆鋒嘅一段「忘年戀」......關係又錯蹤複雜。不過一向我行我素嘅佢,次次都愛得投入,戀愛大過天!

92年,阿菲入行冇耐,同黎明合作拍劇集《原振俠》,入面有一場咀咀戲,即刻傳出緋聞。不過之後兩個各有所屬,戀情先無疾而終。事隔十年,有傳Leon 一直對阿菲都唔死心,03 年揼本3000 萬,請阿菲做電影《大城小事》女主角,又再一次傳緋聞。

96年阿菲突然放棄香港事業,嫁俾音樂人竇唯,仲佗住大女竇靖童,返北京生活。當時阿菲仲俾人影到住喺四合院,朝早幫老公倒痰罐。可惜婚姻維持咗三年,因為高原嘅介入,終於離婚收場。

唔夠一年,阿菲喺梅姐介紹之下識咗當時得二十歳嘅謝霆鋒,兩個一拍即合。00 年,呢一幕「世紀一拖」,轟動全城!不過最後又因爲柏芝嘅出現,阿菲同霆鋒多次分開又再復合,足足糾纏咗五年。

05 年,阿菲終於戲劇性嫁咗俾李亞鵬,開始第二段婚姻。同李亞鵬結婚之後,阿菲生埋細女李嫣,之後長居北京,開始淡出娛樂圈,兩公婆表面上非常恩愛。13 年,阿菲突然喺微博出post :「這一世,夫妻緣盡至此。」宣布同李亞鵬8 年婚姻玩完。

事隔一年,阿菲俾人影到同霆鋒喺屋企親熱,世紀復合。近年阿菲同霆鋒成日出雙入對,一時傳出婚訊,一時又傳阿菲大肚消息。

話時話,睇返阿菲嘅感情缐又真係錯蹤複雜。當年阿菲鏈贏周迅,同李亞鵬結婚。之後周迅又同霆鋒傳過緋聞,而家阿女竇靖童同周迅仲做埋閨蜜。早兩個月,兩個竟然合體上綜藝《幻樂之城》,仲一啲尷尬都冇,唔通真係拎得起,放得低?

立即下載《壹週刊》Apps,隨時隨地睇盡時政專題、深度偵查、娛樂熱話!

按此連結: http://bit.ly/next28app