• 【出盡力同黃智雯爭】搵何國鉦傾戰衣 45歲陳煒做硬視后(足本版)
  • 2018-12-07     22,093

 

今年大台視后競爭唔算激烈,聽聞係《宮心計2之深宮計》飾演太平公主嘅陳煒,同埋《三個女人一個「因」》嘅黃智雯之爭,不過,陳煒今次勝算好高。

呢日壹仔撞到準視后陳煒同時裝設計師兼老友何國鉦嘆平民咖啡,同枱仲有幾個朋友,成班人吹水吹得好happy!

嘆完咖啡大家分道揚鑣,煒哥同何國鉦企埋一邊,繼續傾,傾乜咁好傾,梗係傾頒獎禮嗰晚著咩啦!

咁又係呀,16號就係頒獎禮,煒哥呢位準視后梗係要艷絕全場啦,台慶嗰日冇獎拎,佢都一身大紅lace透視現身,更何況係萬千星輝頒獎禮!

煒哥唔只一早搵定何國鉦幫佢搞戰衣,為咗要贏今年視后,佢出盡法寶,好積極。

首先,佢自己喺唔同嘅社交網站出post拉票,希望大家投佢票。

另外,再搵嚟天后楊千嬅、朱晨麗同男神周柏豪,齊齊合拍咗條搞笑嘅拉票短片,你都咪話唔犀利!

再睇番煒哥認為最有威脅嘅兩個對手

黃智雯同李佳芯。

憑《三個女人一個「因」》成為星、馬雙料視后嘅黃智雯,頒獎禮前公司安排咗佢單拖飛去韓國參加女團學跳舞玩真人騷《一個因去跳舞》,咁聽公司話,唔通…

掛住出活動賺錢同拍劇嘅李佳芯,表現得唔夠積極,冇四出拉票,唔通,佢都疊埋心水輸俾煒哥?

唔怪得煒哥近排心情咁靚啦,原來做硬視后,恭喜恭喜!

攝錄:陳亦龍

立即下載《壹週刊》Apps,隨時隨地睇盡時政專題、深度偵查、娛樂熱話!

按此連結: http://bit.ly/next28app