• 【捱過杜汶澤婚外情】田蕊妮死守19年 俾老公用100蚊搞掂:我好崇拜佢(足本版)
  • 2018-12-09     105,505

 

現年41歲的田蕊妮,由拍拖到結婚,已經同杜汶澤一齊19年。杜汶澤曾經有一段婚外情,當時佢去廁所冇拎電話,小三傳短訊搵佢,俾阿田無意中發現。

阿田最後原諒咗杜汶澤,如果唔係,佢哋依家就唔會咁sweet啦!兩公婆一有時間就拍拖,而且有講唔完嘅話題。

但阿田話自己最想離婚嘅時候,唔係因為有小三,而係因為大家溝通唔到,當時佢甚至試過搬去酒店同朋友屋企暫住。佢話如果唔係老公事業低潮,佢哋應該已經離咗婚。當時佢覺得自己係老公唯一信任嘅人,如果連佢都離開,阿澤會好慘,所以選擇留低。

嗰陣佢乜都睇阿澤唔順眼,直到有日阿澤同佢講,唔好淨係識得每日搵佢缺點,仲話最初佢哋唔係咁㗎……。阿田聽到就叮一聲,醒覺自己每日都嫌棄緊佢。

換一種眼光睇對方,佢慢慢又搵番當初所愛嘅阿澤。依家連佢嘅缺點,喺阿田心目中都變成優點,譬如阿澤性格衝動,換個角度,就係轉數快。

佢話自己真係好崇拜,好愛杜汶澤。因為阿澤一直當佢係囡咁湊,當初入無綫,佢唔想俾人插,推咗唔做《超級巨聲》主持,但阿澤叫佢唔可以覺得冇安全感,就返去個窿度,一直推動佢向前。佢話冇阿澤,佢亦唔有今日嘅精采人生。仲話杜汶澤冇咗佢唔得,佢冇咗阿澤都唔得。

阿澤亦講過最低潮嗰陣,佢冇晒錢,同阿田講佢乜都冇,但阿田話阿澤仲有佢!

依家段婚姻,阿田形容係淡淡嘅甜,不過始終最回味佢哋第一個情人節,當時阿澤窮到燶,用15蚊買咗枝玫瑰,偷偷地放上阿田架車製造驚喜。再煮咗餐飯畀佢食,有魚有肉有菜,仲有幾蚊件嗰種傳統西餅,全部加埋唔使一百蚊。但呢份心思,佢回味到依家,亦因為呢次,令佢情定阿澤,愛足19年。

立即下載《壹週刊》Apps,隨時隨地睇盡時政專題、深度偵查、娛樂熱話!

按此連結: http://bit.ly/next28app